Кәсіпқой бокс: Бекзад Нұрдәулетов голландиялық боксшымен кездеседі

5 ақпан күні Бекзад Нұрдәулетов кәсіпқой бокстан кезекті жекпе-жегін өткізеді. Бұл туралы ол өзінің инстаграм парақшасында жазды, - деп хабарлайды mangystaumedia.kz cайты.

Бұл жолы Бекзад Нұрдәулетовтың қарсыласы голландиялық Чико Куаси. Олар «WBO Youth» белдігі үшін бақ сынайды.

Маңғыстаулық боксшы қазір Ақтау қаласында жаттығу жүргізіп, дайындалып жатыр.

«Бұл жекпе-жекке физикалық дайындықты Грузияда өткіздік. Одан кейін Ақтау қаласында әрі қарай дайындықты жалғастырып жатырмын. Бұйырса, жекпе-жекке сақадай саймын деп айта аламын», - дейді Бекзад Нұрдәулетов.

Жекпе-жекті «Адал» промоутерлік компаниясы ұйымдастырып жатыр. Шаршы алаңдағы бәсеке «Rixos Water World Aktau» қонақ үйінде өтеді.

Айта кетейік, бұл Бекзад Нұрдәулетовтың кәсіби бокстағы төртінші жекпе-жегі. Бұған дейін ол бірде-бір бәсекеде есе жібермеген еді.

Жұлдызай ҚАЛИЕВА

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.