Маңғыстау облыстық «Ана мен бала» орталығының бас акушері Гүлсара Ахметжанова 30 жыл ішінде 10 мыңнан аса сәбиді дүниеге әкелген, - деп хабарлайды mangystaumedia.kz сайты.
Бүгін – халықаралық акушерлер күні. Осы ретте, біз «Ана мен бала» перинаталды орталығының бас акушері Гүлсара Ахметжановамен тілдесіп қайттық.
Гүлсара Өмірбекқызы еңбек жолын 1992 жылы 26 шағынауданда орналасқан перзентханада акушерліктен бастаған. Он жыл босану бөлімшесінде, анестезия және реанимотология бөлімшесінде жұмыс істеген. Ал 2000 жылдан бері бас акушер қызметін атқарып жүр.
«Акушерлік сала күш-қайратты, жауапкершілікті талап етеді. Сонымен қатар ең қажетті мамандық, себебі дүниеге сәбидің келуіне себепші болады. Анаға қуаныш сыйлап, сәбидің кіндігін кесіп, жарқын болашағына алашқы тілек айтатын маман. Одан бөлек орталықта акушер-гинеколог мамандар бар,біз сол мамандардың оң қолымыз», - дейді бас акушер Г. Ахметжанова.
Оның айтуынша, қазіргі таңда облыстық перинаталдық орталықта 100-ден аса акушер жұмыс істейді. Қырық жылдан аса еңбек еткен акушерлер де бар. Атап айтқанда, босану бөлімінің аға акушері Зоя Әлібаева, Гүлбарша, Жәмила, Шолпан сынды мамандар бар.
Сонымен қатар бас акушер жас аналарға өз кеңесін айтты. Маманның айтуынша, жүкті болғаннан бастап ертерек әйелдер кеңесіне жазылып, уақытылы есепке тұруы қажет. Одан кейін анализ тапсырып, талдауларына алуы керек. Барлық этаптан өткеннен кейін орталыққа психологиялық тұрғыда дайын болып келуі керек.
«Бізге келгенде серіктестік босануға болады. Яғни, жанына анасы, құрбысы немесе жолдасы, жеңгесі босануға қатыса алады. Мұндай серіктестік босану әйелге эмоционалды, моральді тұрғыда қолдау көрсету үшін маңызды. Сондай-ақ босану бөлмелері жеке орналасқан. Дүниежүзілік денсаулық сақтау ұйымының бағдарламасы бойынша барлық босану залы үйге сәйкестендіріліп жасалған. Бұрын мұндай жағдай жоқ еді», - дейді бас акушер Гүлсара Ахметжанова.
Гүлсара Ахметжанова өзі еңбек еткен жылдардағы қиындықтар мен қызықты оқиғаны еске алып, бүгінгі таңда медициналық қызмет көрсету деңгейінің өскенін, құрал-жабдықпен жабдықталып, аналарға жақсы жағдай жасалғанын тілге тиек етті.
Жұлдызай ҚАЛИЕВА
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
