Ұйымдастырушылар: Психолог мамандардың білімі мен білігі көп мәселені шешеді

Маңғыстау облысы жастар саясаты басқармасының тапсырысы «Азаматтық бастамаларды қолдау орталығы» КЕАҚ қолдауымен «Жастар EQ» әлеуметтік жобасы аясында өңірдегі жастармен жұмыс істейтін жас психолог мамандардың 5 компоненттік оқыту жүзеге асып жатыр, деп хабарлайды mangystaumedia.kz.

Оқытуға іріктеу үшін арнайы байқау жарияланып, өңірдің 20 психолог маманы таңдалып алынған болатын. Олардың арасында балабақша, мектеп, колледж, медицина саласының психолог мамандары мен жеке практик-психолог мамандар және енді қызметін бастаған жастар да бар. 5 компонентті оқытудан өткен психолог мамандар жастарды психологиялық қолдау бағытында түрлі жобаларға тартылып, өңірдегі мәселелерді алдын алу мен шешілуіне ықпал ететін болады.

Жастардың психологиялық мәдениетін қалыптастыра отырып, психикалық, менталдық, денсаулығын нығайтып, жастардың эмоционалды интеллектісін көтеруге ықпал ететін жобаның бүгінге дейін «Жастар арасындағы суицидтің алдын алу» және «Эмоционалдық интеллектіні дамыту» тақырыбындағы модульдерін психолог, БҰҰ балалар қорының ұлттық тренері, Еуропа психологтар қауымдастығының мүшесі, PhD кандидат, суицидолог Сымбат Абдрахманова тамыз айының алғашқы аптасында жүргізген болатын. Үшінші модульде профессор, «Болашақ» бағдарламасының түлегі, практик-психолог, осы саладағы бірнеше кітаптардың авторы, «Психология шеберлік мектебіні» негізін қалаушы Күлмаш Елшібаева «Бала психотипін анықтау және коррекция. Профайлинг негіздері» тақырыптарын оқытты. Төртінші модульге арналған оқытуда балалар психологы, республикалық тренер, «Ата-ана білмейтін қателіктер», «Балам көңілім саған алаң» тақырыбында кітаптарының авторы Мөлдір Тоғжанова «Ата–ана мен бала психологияссы және қарым-қатынасы» тақырыбында оқытып, қатысушыларға тың ақпараттар мен диагностикалау әдістерін ұсынды. Алдағы қыркүйек айында «Адам жанының дағдарысы және жан-жыныстық жетілу» тақырыбында психоаналитик Анна Кудярова келеді деп жоспарланып отыр.

- Өңірдегі жастармен жұмысты жандандыру үшін 20 психолог маманды іріктей отыра, жастарға психологиялық көмек көрсете алатын кемінде 20 коуч –психолог дайындауды көздеп отырмыз. Жастар арасында лудомания, нашақорлық, ерте жүктілік, суицид сынды мәселелерді түбегейлі жою мүмкін емес, алайда жобаның ықпалымен аталған мәселелерді алдын алу үшін мамандардың кәсіби деңгейі мықты болу керек. Сондықтан біз жоба аясында алдымен мамандардың кәсіби құзіретін көтеріп, кейін оларға жүгінетін жастардың мәселесін шешуге ықпал етеміз деген ниеттеміз. Жоба тек психолог мамандарды оқыту емес, қазір әлеуметтік желіде отырған жастар үшін пайдалы контент жүргізуді де кіріктіріп отыр. Жоба аясында арнайы @eq_mangystau.zhastary парақшаcы жұмыс жасайды. Ол парақшада осы уақытқа дейін психотерапевт Салима Сатылғанқызы, эксперт-психолог Лимана Құттыбекқызы сынды мамандар тікелей эфирде менталдық саулық, психологиялық білім туралы ақпарат беріп, өңір жастарының сұрақтарына жауап беруде. Сондай–ақ, жастармен десанттық кездесулер сериясы мен тренингтер өткізу жоспары тұр.

- Мен бұл курсқа іріктеуден өткеніме қуаныштымын. Өзімнің кәсіби мамандығымды жаңа біліммен толықтыру, клиентпен жұмыста түрлі техникалар мен әдістерді игеруге мүмкіндік. Тек университет берген базалық біліммен шектеліп, мектеп психолог-педагогы деңгейінде ғана емес, барлық адамдарға, әсіресе жастарға көбірек пайдалырақ болсам деп ойлаймын. Кабинет ашамын деп жоспарлап жүрмін, жастардың психологиялық білімін жетілдіруге өзімінің қолымнан келгенін көмегімді беру үшін бұл оқытудан аз білім алған жоқпын. Бізге сабақ берген тренерлердің білімі мен әдістері мен үшін құнды ақпараттар болды, - дейді курс қатысушысы Азамат Айсұлу.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.