Бүгін, 9 қарашада Ақтаудағы 40-шағынаудандағы саябақта Қазақстан мен Әзірбайжан халықтары ынтымақтастығының символы ретінде «Достық аллеясының» ашылу рәсімі өтті, деп хабарлайды mangystaumedia.kz.
Бұл жерде 250 көшет отырғызылды, оның 150-і Қызыл кітапқа енген әрі Әзірбайжан флорасының символы ретінде Бакудан әкелінген. Атап айтқанда, эльдар шыршасы, хан шынары, нар, зәйтүн, бадам және басқа да жеміс ағаштары отырғызылды.
Аллея «Жасыл әлем үшін бірлік жылы» және «Таза Қазақстан» экологиялық шарасына орай Әзірбайжанның Ақтаудағы Бас Консулдығының және Ақтау қаласы әкімдігінің қолдауымен ашылды.
Маңғыстау облысы әкімінің орынбасары Аббат Өрісбаевтың айтуынша, Достық аллеясының ашылуы екіжақты қарым-қатынастың ерекше маңызын көрсететін жарқын оқиға болмақ.
«Таза Қазақстан» бағдарламасы аясында ашылған Достық аллеясы болашақ ұрпақтарға достық пен ынтымақтастықтың символы ретінде қызмет етеді. Ұйымдастыруға көмектескен Ақтаудағы ботаникалық бақ ұжымына, Әзірбайжан диаспорасына, әзірбайжандық кәсіпкерлерге және Yessenov университетінің студенттеріне ерекше алғыс білдіремін», – деді Аббат Өрісбаев.
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
