Ақтаулық спортшы Азия чемпионатынан алтын алды

Азия чемпионатына елдің барлық өңірінен және Испания, Израиль, Өзбекстан, Қырғызстан, Тәжікстан мемлекеттерінен келген 400-ге жуық спортшы қатысты. Жарыста ақтаулықтар 2 алтын, 1 күміс және 1 қола медаль жеңіп алды, - деп хабарлайды mangystaumedia.kz сайты.

Қыздар арасында 8-9 жас аралығында 30 келіге дейінгі салмақта Төлеген Бейбіт Батырбекқызы алтын медаль жеңіп алды. Ал бапкері Азамат Жұлдызбай ересектер арасында 65 келі салмақта чемпион атанды. Сондай-ақ 16-17 жас аралығында 65 келіге дейінгі салмақта татамиде өнер көрсеткен Райымбек Шынтай күміс медаль иегері атанды. Ал 8-9 жас аралығында 35 келіге дейінгі салмақта өнер көрсеткен Бауыржан Әмір қола медальді қанағат тұтты.

"Татамиде мен үш қарсыласымнан басым түстім. Барлық жекпе-жекте айқын басымдықпен жеңіп шықтым. Жеке бапкерім мені әрдайым жеңіске жетелеп жүр. Жалпы жеңіс тұғырынан көріну үшін көп тер төгуге тура келеді. Алда басқа да жарыстарға тыңғылықты дайындалып, әлі де атой саламын деп ойлаймын", - дейді Азия чемпионы Бейбіт Батырбекқызы.

Каратэшілер Ақтау қаласындағы 19 ш/а орналасқан «Чемпион» спорт залында жаттығады. Қыркүйек айында Жаңаөзен қаласында Азия біріншілігін өткізу жоспарланған. Қазіргі уақытта спортшылар кезекті оқу-жаттығу жиынына кірісіп кетті.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.