Маңғыстауда спорт басқармасы отбасылық үлгідегі балалар ауылын жаңа жылмен құттықтады

Маңғыстау облыстық спорт басқармасы басшысының орынбасары Айбек Имашев пен спорт мектептерінің басшылары облыстық отбасылық үлгідегі балалар ауылына сыйлық апарып, жаңа жылмен құттықтады, деп хабарлайды mangystaumedia.kz.

Спорттағы басшылар балаларды жаңа жылымен құттықтап, спортқа қажетті құралдар мен тәтті сыйлықтар табыстады. Бокстан әлем чемпионы Ердос Жаңабергенов пен олимпиада ойындарының жүлдегері Әділбек Ниязымбетов тәрбиеленушіге былғары қолғап кигізіп, бокстың әдіс-тәсілін көрсетті. Ал «Каспий» ФК директорының міндетін атқарушы Ержан Жамбыров доп тебуді үйретті. Айбек Имашев балаларға ізгі тілегін айтып, спортпен шұғылдануға шақырды.

- Балалар – елдің болашағы. Сондықтан жаман әдеттерден аулақ болып, спортпен шұғылдануға шақырамыз. Спортпен айналысқысы келетін балалар үшін барлық мүмкіндікті жасаймыз, - деді спорт басқармасы басшысының орынбасары Айбек Имашев.

Сондай-ақ балалар үйінің басшысы спорт саласының майталмандарына алғысын білдіріп, балалар үйінде тәрбиеленіп жатқан балалардың жетістіктерін айтып өтті.

- Біздің балаларымыз да спорттан кенде емес. Жасы кіші болса ауыр атлетикамен айналысып, жүлделі орындарға ие болып жүрген балаларымыз бар. Олар да сіздердің жолыңызды жалғап, елін сүйетін тұлға болып қалыптасса – жеткен жетістігіміз сол болар еді. Балаларды назардан тыс қалдырмай, келіп құттықтап жатқаныңызға рақмет, - деді облыстық отбасылық үлгідегі балалар үйінің басшысы.

Махаббат Нұржанқызы

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.