Жаңаөзенде жамбы ату мен теңге ілуден облыстық чемпионат өтті

Жаңаөзен қаласында тұңғыш рет теңге алу және жамбы атудан облыстық чемпионат өтті. Жарыс жеңімпаздары республикалық чемпионатқа жолдама алды, деп хабарлайды mangystaumedia.kz сайты ҚКО сілтеме жасап.

Чемпионатқа 7 команда қатысты. Қатысушылар жасөспірімдер, жастар және ересектер тобы болып үшке бөлінді.

- Бұл – жамбы ату мен теңге ілуден өткізіліп отырған алғашқы чемпионат. Осы алғашқы қадамымыз Жаңаөзен қаласында басталды. Жарыста үздік шыққан спортшылар 2 маусым күні Нұр-Сұлтан қаласында өтетін республикалық чемпионатқа жолдама алады. Ұлттық спорт жауынгерлік дайындықты жетілдіріп, шымыр болуға септеседі. Сондықтан да мұндай жарыс жастардың спортқа деген қызығушылығын арттырып, дәстүрдің өшпеуі жолында маңызы зор, - деді Жамбы атудан аға жаттықтырушы Сәнім Мұрадова.

Чемпионат қорытындысы бойынша «Жамбы атудан» «Жасөспірімдер» арасында бірінші орынды Қарақия ауданынан қатысқан Айбек Ораз алса, екінші, үшінші орынды Жаңаөзен қаласынан қатысқан Досымхан Сүйеубаев пен Ясин Сейілханов иеленді. Ал жастар арасында бірінші орынды Жаңаөзен қаласынан қатысқан Мақсат Идрейсов алса, екінші, үшінші орынды Қарақия ауданыны қатысқан Әділхан Өмірзақ пен Сүйіндік Нұриман алды. «Ересектер» арасында бірінші орын Қарақия ауданынан қатысқан Жеңісбек Ертрекке бұйырды. Екінші орынды Жаңаөзен қаласының атынан қатысқан Бердалы Ербол алды. Үшінші орын Бейнеу ауданынан келген Илияс Ауғанбаевқа бұйырды.

Ал «Теңге ілу» жарысында «Жасөспірімдер» арасында бірінші орынды Түпқараған ауданынан қатысқан Абылай Қоныскерей алса, екінші орынды Түпқараған ауданынан келген Әли Асарбек иеленді. Үшінші орынды Мұнайлы ауданынан Алмас Берікұлы алды. Ал «Жастар» арасында бірінші, екінші орын Түпқараған ауданынан қатысқан Иса Жаңғабыл мен Асхат Ергенұлына бұйырды. Үшінші орын Бейнеу ауданынан қатысқан Исмайл Оралбай алды. Сондай-ақ, «Ересектер» арасында бірінші орынды Қарақия ауданынан Ерлан Дүйсенбай алды. Екінші орын Мұнайлы ауданынан Мансұр Жұмыровқа бұйырды. Үшінші орынды Бейнеу ауданынан қатысқан Азамат Жәумітбаев иеленді.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.