Кіндік қаны тамған өлкенің қадір-қасиетіне жете білуді жасынан түйсінген, балаң жасынан бедерлі сөзге бейім Кенжебек Сержан ілгеріде-ақ білім мен ізденіске құштарлығымен ілкі буынның назарына іліккен, ел аузындағы ескілікті әңгіме, көкірегі көмбе қазына-қарияның ұлағатына ерек ықылас танытып жүретін қасиетімен есте қалған еді. Жасынан аталы сөзге үйір боп өскен оның көркем әдебиетке, кітап қазынасына шынайы құмарлығы өлең өлкесіне қанат қағуына септесті. Кенжебектің осыған дейін жарық көрген өлең жинақтары Бейбіт елдің ұланымын» (2014), «Ғибратты ғұмыр» (2015) өз оқырманының жоғары бағасын алды. Жуырда жас қаламгердің “Ер мен ел” атты деректі прозасының тұсаукесер рәсімі өтті. Көлемі 11 баспа табақ кітаптың көтерген жүгі- ауыр, діттегені — туған өлке тарихы мен тұлғалар тағылымы хақында тың деректерді оқырманға таныстыру. Тынымсыз оқу, үздіксіз ізденіс, ой-толғам нәтижесі. Өрісті өлкенің өрелі тарихын кестелі сөзбен көркемдеген Кенжебектің қаламгерлік қолтаңбасы хақында Қазақстанның еңбек сіңірген қайраткері Серік Негимов былай дейді: “Ұлт тұлғалараның тарихи еңбегін, тағылымын, даналығын жан-жақты, толық толғап, ұғынықты тілмен жатық түсіндірген. Әрбір кемеңгер тұлғаның өмірбаянын тарихи құжаттармен, шежірелік деректермен нық дәйектеп отырады. Тақырыпқа байланысты оі-пікірлерін кемел мысалдармен, үздік афоризмдермен тұздықтап ширатып отырады”.
Көрнекті ғалымның көшелі пікірі тегін болмауы тиіс. Түптеп келгенде оқырманды мол рухани олжаға кенелткен кітап құрылымы өте ұғынықты. Түбек төсін ен жайлаған ерен халықтың тұрмыс-тірлігі, ата-ғұрып, дәп-дәстүрі, жақсы-жайсаңы мен маңдайына біткен марғасқалары жөнінде мол мағлұмат жүйеленіп жинақталған. Біздің ұққанымыз бұл жинақ жаугершілік заманда ата қоныс, баба жұрттың намысын жатқа бермеуде жанын пида еткен баһадүрлер ерлігін дәріптеу , өскелең өрендер бойына өнегесін сіңіру ғана емес, бүгінгі күн бедерінен қилы заманды бастан өткерген қазақ еліңнің еңсесін тіктеуде қажырлы еңбек еткен аға буынның азаматтық, адамдық болмысына әділ баға беруді көздейді. Кітапта жас қаламгердің журналистік қырын айқындайтын танымдық материалдары да топтастырылған. Кенжебек Сержан Л.Гумилев атындағы Еуразия университетінің журналистика факультетінің түлегі. Өңір баспасөзінің қара шаңырағы - «Маңғыстау» газетінде қызмет етіп, журналистика майданында шыңдалған маман. Оның өлке тарихын өзге қырынан зерделеу, ақтаңдақтар ақиқатын ұғынуға деген айрықша ұмтылысы өлкетану ғылымымен кеңінен айналысуына түрткі болғаны айқын.
Жуырда өткен жаңа кітаптың тұсаукесер рәсімінде жиылған жазбагер қауым жас қаламгердің туған өлкенің өркендеу жолын тарихи қырынан кешенді талдауға талпынысы мен шығармашылық аяқ алысы турасында ой сабақтады. Кенжебек Сержанның ұлт әдебиетінің арнасының ұлғаюына қосқан үлесін, қаламгерлік қарым-қабілетін және алда қазақ қоғамының, ұлт мәдениетінің өрістеуіне сіңіретін еңбегіне баға берді.
Алдымен облыс әкімінің орынбасары Аббат Өрісбаев халықтың рухани кемелденуіне, әсіресе жас буынның тарихи жадының жаңғыруына, ұлт мәйегін ұлықтауда еңбек сіңіріп жүрген өр ұланның шығармашылығына шабыт тіледі. Сондай-ақ өңір басшысы Нұрдәулет Қилыбайдың құтықтау хатын табыстады.
“Сіздің шығармашылығыңыз арқылы біз туған жеріміздің терең тарихына тағы бір қадам жақындай түсеміз. Өлке тарихы мен тұлғалар өсиетін зерделеу - әрбір ұлттың болашағына бағдар болатын маңызды іс. Сондықтан бұл жинақ жас ұрпаққа рухани азық боларына сенемін”, - делінген өңір басшысының құттықтау хатында.
“Біз аға ұрпақ уақыт атты ұлы ұстаздың, ата-баба рухының алдында есеп беруге міндеттіміз. Бәріміз бір халықтың, бір атаның ұрпағымыз. Мүддеміз -бір.. Осындай рухани кештерге біз қызықтау үшін емес, бізден кейін маңғаз Маңғыстау, қазақтың салқар атырабы кімге қалып бара жатыр деген оймен келеміз. Жастарды сыртқы дұшпанға, ішкі итаршыға талатпай, қорлатпай, бабалардан қалған ұлы жолды балаларға жалғайтын кім бар деген мәселенің айналасында бас қосамыз. Серік Негимов сынды Арқа азаматының пікірі көзіме шалынды. Танымал ғалым кітаптың алғысөзінде «Кенжебек жәй ұғынықты тілде деректермен әр сөзін бекітіп, афоризмдермен, мақал-мәтелдермен тиянақтап, шағын кітапты елге құнды дүние қылып жеткізген екен» деп пікір білдіреді. Алқажан ағамыз тектілік жөнінде сөз қозғаған екен. Тектілік - көмбе алтын ғой. Оның құнын дер кезінде түйіснген жөн. Себебі халық уақыттан ұтылса, бақыттан ұтылады”,-деп түйіндеді өз сөзін ақын Сабыр Адай.
Жиылған жұртшылық туған өлке тарихын шығармашылығына арқау еткен жас қаламгердің кесек кейіпкерлері, көркем ойы мен ізденіс-ұмтылысы турасында тың деректерге қанықты. Бағзы баба өсиетін бүгінге жалғаған жас өреннің өрелі ісіне сәттілік тіледі.
Голрох Жеменей
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
