Ақтауда екінші рет кәсіби бокс кеші өтеді

Бүгін боксшылардың қарсыласы белгілі болды. Олар жекпе-жек алдында салмақ өлшеп, қарсыласымен көз түйістірді, - деп хабарлайды mangystaumedia.kz сайты.

Кеште Мейірім Нұрсұлтановтың қарсыласы ресейлік Андрей Сироткин болады. Маңғыстаулық Бекзад Нұрдәулетов нидерландық Чико Куасимен кездеседі. Сонымен қатар ақтаулық Бекман Сойлыбаев Мексикадан келген Элиот Чавеспен шаршы алаңда бақ сынасады.

Айта кетейік, Бекзад Нұрдәулетов Нидерланды елінің өкілі Чико Куасимен WBO тұжырымы бойынша жастар арасындағы әлем чемпионы үшін жұдырықтасады. Ал Мейірім Нұрсұлтанов WBO International белбеуі үшін чемпиондық кездесу өткізеді. Бұл кештің басты ерекшелігі болмақ.

"Жаңадан құрылған компания болсақ та дәрежесі жоғары титулдық жекпе-жек ұйымдастырып жатырмыз. Мұның өзі үлкен жетістік. Барлығы 8 кездесу өтеді. Негізгі 3 кездесу бар. Мейірім Нұрсұлтанов, Бекман Сойлыбаев, Бекзад Нұрдәулетовтың қарсыластары әлемдік рейтингте жоғары көрсеткішпен тұр. Сондықтан боксшылардың жеңіске деген мүмкіндігі - 50/50. Тартысты жекпе-жек болады деген үміттеміз", - дейді "Adal" промоутерлік компаниясының менеджері Жанпейіс Назарғали.

Оның айтуынша, ресейлік Андрей Сироткин әлемдік рейтинг бойынша 26-орында тұрған боксшы, 4 рет титулдық жекпе-жекке шыққан. Екі тұжырым бойынша 2 рет Азия чемпионы атанған.

Ал Бекзат Нұрдәулетовтың қарсыласы Чико Куаси осы уақытқа дейін 6 кездесу өткізген. Ешқайсынан есе жібермеген. Әлемдік рейтингте 86-орынға жайғасқан

"Титулды алған боксшы әлемдік рейтингтегі орнын өзгертеді. Сонымен қатар бокстағы 15 үздік спортшының қатарына кіруге мүмкіндік береді", - дейді Жанпейіс Назарғали.

Қазіргі таңда Мейірім Нұрсұлтанов әлемдік рейтингте 50-орында тұр. Бекзад Нұрдәулетов 124-орында болса, ал Бекман Сойлыбаев 150-орында тұр.

Одан бөлек кәсіпқой бокс кешінде алматылық боксшы Сапарбай Айдарбай Ресейден келген Давид Николаевпен рингке шығады. Жаңаөзендік Арман Нұрасылов Рудныйдан келген Илья Медяникпен жұдырықтасады.

Сондай-ақ, Шетпе ауданынан келген Самат Жетібаев пен ақтөбелік Алтай Қылышбай, Мұнайлы ауданының боксшысы Қыдырәлі Мұрат пен Өзбекстаннан келген Богдан Утегенов, ақтаулық Жолдас Жеңісов пен ақтөбелік Айдос Тастаев шаршы алаңға шығады.

Жұлдызай ҚАЛИЕВА

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.