Ақтауда қазақ күресінен ел чемпионаты өтіп жатыр

Бүгін Ақтауда қазақ күресінен 2005-2006 жылы туған жасөспірімдер арасында ҚР чемпионаты басталды. Жарысқа 14 облыс және Нұр-Сұлтан, Шымкент, Алматы қаласынан келген 500-ге жуық спортшы қатысып жатыр, - деп хабарлайды mangystaumedia.kz сайты.

Дүбірлі доданың ашылу салтанатында Маңғыстау облысы әкімінің орынбасары Қ.Жұмашев, республикалық «Қазақстан барысы» сайысының алғашқы жеңімпазы Ұлан Рысқұл және ҚР Қазақ күресі федерациясының бас хатшысы Бағдәулет Маратұлына сөз берілді. Олар әр өңірдің намысын қорғайтын балуандарға сәттілік тіледі. Сонымен қатар байрақты бәсекенің жоғары дәрежеде өтуіне атсалысқан ұйымдастырушыларға алғысын айтты.

«Балалар арасындағы дәстүрлі ел чемпионаты жоғары деңдейде өтіп жатыр. Балуандар 10 салмақ дәрежесі бойынша, яғни 38 келі салмақтан 75 келі салмаққа дейін бақ сынайды. Жарыс жеңімпаздары республикалық ұлттық құраманың мүшелігіне жолдама алады және спорт шеберіне үміткер атағын иеленеді. Алдағы уақытта қазақ күресінен балалар арасында Азия кубогын ұйымдастыруды жоспарлап отырмыз», - дейді ҚР Қазақ күресі федерациясының бас хатшысы Бағдәулет Маратұлы.

Айта кетейік, жарыстың қорытындысы ертең, 5 ақпан күні белгілі болады.

Жұлдызай ҚАЛИЕВА

Суреттерді түсірген Талант ҚҰСАЙЫН

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.