Облыстық әкімдік тарапынан құрылған мониторингтік топ Ақтаудағы кәсіпкерлік нысандарды тексерді, - деп хабарлайды mangystaumedia.kz.
Рейд барысында эпидемиологиялық ахуалға байланысты қаулыдағы талаптар сақталмаған кафелер мен жұмыс істеуге тыйым салынған компьютерлік клубтар анықталды. Келуші саны 30-дан асып, би алаңы ұйымдастырылған кафе иесіне мониторингтік топ жеңілдетілген карантин кезіндегі негізгі талаптарды еске салып, түсіндіру жұмысын жүргізді. Сондай-ақ, арақашықтық сақталмаған дәмхана әкімшілеріне де ескерту беріліп, үстелдерді санитарлық талапқа сай етіп қою тапсырылды.
Ал, жеңілдетілген карантин кезінде де жұмыс істеуіне мүлде рұқсат етілмеген компьютерлік клубтардың жұмысы дереу тоқтатылып, қожайындарына ескерту берілді.
Айта кетейік, мониторингтік топ құрамында қалалық тауарлар мен көрсетілетін қызметтердің сапасы мен қауіпсіздігін бақылау басқармасының маманы, облыстық жұмыспен қамтуды үйлестіру және әлеуметтік бағдарламалар басқармасының басшысы, қалалық ТҮКШ маманы мен облыстық кәсіпкерлік басқармасының мамандары болды.
Махаббат НҰРЖАНҚЫЗЫ
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
