Журналист Жалғас Айтқұлов өмірден озды

Қарақия ауданына елеулі еңбек еткен аға журналист Жалғас Айтқұлов өмірден озды.

Ол 1953 жылдың 28 тамызында Түрікменстан Республикасы, Ташауыз облысы, Көне Үргеніш ауданына қарасты Ақтелпек Нағиев атындағы ауылдық кеңесінде мұғалімдер отбасында дүниеге келді.

Жалғас Айтқұлов 1960 жылы сол жердегі №49 орта мектебіне қабылданып, 1970 жылы орта мектепті бітіргеннен кейін, Жамбыл облысындағы Құлан деп аталған (бұрын Луговой атанған) шағын қаладағы зооветтехникумына түсіп, зоотехник мамандығын алып шықты.

Туған ауылында 1976-1979 жылдарда ферма зоотехнигі, 1979-1981 жылдарда Бейнеу ауданындағы Сам кеңшарында зоотехник, 1981-1984 жылдары Жетібай түйе шаруашылығында зоотехник, 1984-2004 жылдар аралығында аудан әкімшілігінде маман, 2005-2018 жылдар аралығында Қарақия аудандық «Қарақия» газетінде тілші, жауапты хатшы қызметтерін атқарды.

Жалғас Бердімұратұлы жастай кітап оқуға құмар болып өсті. Оның кітапқұмарлығы сондай – қашан көрсең де оның қолтығында бір әдеби кітап қыстырулы жүреді. Кітапқұмарлық оны әдебиет атты киелі ұғымның қақпасын қағуға итермеледі. Мөлдіретіп өлең де жазды, пайымды прозаға да бет бұрды, келісті көсемсөз де көсілтті. Өлеңдерін өз жанына серік етті. Өйткені оларының бір-жарынан басқасын жарияламады. Өлеңдерінен гөрі прозасын көбірек пайдаға асырды. Оны әр жылдары аудандық газетке жариялап отырды. Ал көсемсөзі аудандық газетте істеген жылдары көптеп басылды.

Осындай шығармашылығының арқасында 2016 жылы Алматыдағы «Нұрлы-әлем» баспасынан «Тылсым дүние» атты кітабы жарық көрді. Ол зейнеткерлікке шыққан соңғы 2-3 жылдан бері Түпқараған ауданының Сайын елдімекеніне қоныс аударды.

Жалғас Айтқұловтың мезгілсіз өмірден өтуіне байланысты оның отбасына, туған-туысқандарына қайғыра көңіл айтамыз.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.