Электр энергиясын талан-таражға салып жүрген кімдер?

Электр энергиясы бойынша соңғы жылдары Ақтауда тұрғындар шағымы толастаған емес. "AllianceEnergoSnab-Актау" ақтаулықтарға қызмет көрсетуді қыркүйек айынан бастап «Маңғыстау Жарыққа» өткізіп бергенімен, электрге қатысты жыр таусылған жоқ. Ал, "AllianceEnergoSnab-Актау" құрылтайшылары енді Жаңаөзенге ауыз салуда. Бұл жерде Аталған компания мен Ақтаудағы өзге де электркомпаниялардың артында кім тұр? 2018 жылы түрмеге тоғытылған қылмыстық топтың сыбайластары кімдер? Мәселенің байыбына жету үшін «Электр Жүйелері» мекемесінің заңды қорғаушысы Абзал Құспанмен тілдескен едік.

«Электр Жүйелері» мекемесінің жаңаөзендіктерге қызмет көрсетіп отырғанына 30 жыл. Аталған компания өкілдері "AllianceEnergoSnab-Актау" атынан әрекет етушілердің заңсыз әрекеттерінен мезі болғанын айтады. Себебі, "AllianceEnergoSnab-Актау" құрылтайшылары атынан әрекет етіп жүргендер рейдерлік шабуыл жасаған соң да, заңсыз әрекеттерін тоқтатар емес.

Аталған жайтқа қатысты белгілі құқыққорғаушы Абзал Құспан былай дейді:

- Құжаттарды зерделеу барысында көзім жеткені - жай ғана заңбұзушылық емес, қылмыс орын алып отыр деп айтуға толық негіз бар. Бұл - «Электр Жүйелеріне» қатысты Маңғыстау облыстық қылмыстық істер бойынша мамандандырылған сотында қаралып жатқан іс. Қылмыстық істің негізінде –"AllianceEnergoSnab-Актау"-дың құрылтайшылары «Электр Жүйелері» мекемесінің 90 пайыз үлесін отбасына қысым көрсету арқылы өздеріне заңсыз жазып алуы көрсетілді. Бұл жерде рейдерлік шабуыл орын алған. 2018 жылы "AllianceEnergoSnab-Актау" атынан келген олар осы кезге дейін жаңаөзендік мекемені тек тонаумен айналысқан. Мәселе тек бір адамның бизнесіне зиян келуінде емес, сондай-ақ бұл жерде тұтынушылардың құқығы да бұзылып отыр. Өйткені, кез-келген бизнес құрылымы түскен пайданы қалтасына сала бермей, техникалық базаны жаңартып, көрсетілетін қызмет сапасын көтеріп, жұмысты ілгерілетуге күш жұмсау керек. Құжаттарды қарасақ, миллиардтың үстінде ақшаны қолды қылып отыр. Аталған негізде қылмыстық топ ретінде адамдар ұсталып, қазір сот үкімін күтуде, - дейді ол.

Алайда, кейде түрмеде отырғанымен, кейбіреулердің билігі жүре беретіні белгілі. Тергеу изоляторында отырған қылмыстық топты басқарушы сенімгерлік құқығын өз адвокатына береді. Енді, «Электр Жүйелеріне» қысым көрсетуді адвокат бастаған.

- Адвокат өзіне берілген құқықты пайдаланып, «Электр Жүйелерін» банкроттық деп тануға сотқа шағым береді. Ең қызығы – сот шешімі болмаса да, Жаңаөзен қаласының әкімдігі «Электр Жүйелерін» банкроттық деп тану туралы газетке хабарлама бергені. Хабарламада «Электр Жүйелері» банкрот деп танылғандықтан, тұрғындарға енді «Маңғыстау жарық» қызмет етеді деп көрсетілген. Шағымды қараған сот «Электр Жүйелерінің» жұмыс жасауға толық мүмкіндігі бар деген қорытынды береді. Содан, 2021 жылдың мамыр айынан бастап мекеме жұмысшылары бастаманы өз қолдарына алып, жұмыс жасай бастайды. Әлгі адвокатты кеңсеге кіргізбейді. Себебі - сенімгерлік берілген адвокаттың басқарумен айналысуға құқғыы жоқ. Қынжылтатыны - аталған компания өкілдері түрмеде отырғанымен, әкімшілікте бұларға нұсқау беріп отырғандардан бастап, бірлесе қылмыс жасаған энергия компаниялары көлеңкеде, жазасыз қалуы, - дейді Абзал Құспан.

Сенімгерлік құқықта 20 пайыз ғана қаржы тиесілі деген адвокат 27 миллион 500 мың теңгені еш себепсіз қалтасына басқан. Қолды да өзі қойған. Бүгінде ол адвокаттың үстінен алаяқтық бабы бойынша сотқа арыз бердік дейді А.Құспан.

Ал, бізді мазалайтын сұрақ - "AllianceEnergoSnab" , МАЭК, МРЭК сынды Маңғыстау облысы бойынша энергия саласында қызмет көрсететін компанияларға бұйрығын орындатып артында кімдердің отырғандығы.

Жалғасы бар

Кәмшат СӘРСЕНБАЕВА

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.