Кадрлық тәжірибе алмасу - маңызды

Аймақты дамытудың негіздерінің бірі – кадр жүйесіндегі өзгерістерге де орын беру. Яғни, өзге аймақтағы білікті кадрлармен орын алмасып, тәжірибелерімен бөлісу. Бұл туралы президент жолдауын талқылауға арналған ақсақалдар кеңесі барысында Маңғыстау облысының әкімі Нұрлан Ноғаев сөз етті. Жиында сондай-ақ, «Қошқар ата» улы көлін залалсыздандыру, аймақтағы қуаңшылық мәселесі де ортаға салынды.

Ең алдымен өңір басшысы алғашқы жұмыс кездесуін аймақ ақсақалдарының батасымен бастауды жөн көргенін жеткізді.

- Елмен алғашқы жүздесуімді өздеріңізден бастап отырмын. Сіздердің бүгінгі айтар уәждеріңіз бен көтерер мәселелеріңіз қоғам үшін маңызды, құнды ойлар екені сөзсіз. Сіздер осы тәуелсіздіктің тұғырлы болуына қоғамның қай саласында болмасын еңбек етіп, үлес қосқан буынсыздар. Ұшан-теңіз өмірлік тәжірибелеріңізді, білім-біліктеріңізді сабақтастыратын, егемен елдің көшін жалғайтын жас ұрпақ, жаңа буын жетіліп келеді. «Қазақ елі» деген қастерлі ұғым - халық пен биліктің, үлкен мен кішінің, ағайын мен көршінің біртұтастығында ғана мәңгілік болмақ. Сөзі мен ісі бір жерден шығатын қауым барлық қиындықтарды жеңіп, игіліктерге қол жеткізеді. Әбіш ағамыздың «Бостандық – ұлтты бодандықтан да қатты сынайды» дейтін қанатты сөзін әсіресе бүгінгі күні пайымдап, терең түсінуге тырысу қажет, - деді Н.Ноғаев.

Аймақ басшысының айтуынша, қазір пандемия салдарынан құлдыраған экономиканы қалпына келтіру міндеті тұр. Мемлекет басшысының жаңа жолдауында Маңғыстау өңірінің әлеуметтік-экономикалық ахуалын жақсартуға тікелей қатысты алғышарттар мен міндеттер қойылған. «Астрахань-Маңғыстау» магистралды су құбырын жаңғырту мен Кендірліде су тұшыту зауытын салу, геологиялық барлау және жер қойнауын кешенді зерттеу секілді нақты тапсырмалар берілген.

Жолдауды талқылау кезінде Маңғыстау облыстық ардагерлер кеңесінің төрағасы Серікбай Төлетов Маңғыстау облысында жерасты сулары пайдаланылмай отырғанын айтты.

- Жолдауда жайылымдық жерлерді суландыру арқылы жем-шөп қорын жасауды, халықты ауыз сумен қамтамасыз ету мәселелері де кеңірек айтылды. Маңғыстаудың Үстірт дөңіндегі кең алқап мал шаруашылығы үшін тиімді пайдаланылмай келеді. Үстіртте аталарымыз пайдаланған ондаған суы мол шыңырау құдықтар қараусыз қалған. Қазіргі техникалық мүмкіндіктерді пайдалана отырып, бұл құдықтардың су көздерін аршып, мал өсіруге ниетті жеке шаруа қожалықтарына беретін болсақ, ел бүгінгідей қуаңшылық зардаптарын тартпас еді, - дейді С.Төлетов.

Мемлекет басшысы жолдауда елдегі азық-түлік өнімдерінің шектен тыс өсіп кеткенін, мұның қарапайым халықтың әлеуметті жағдайына кері әсерін тигізіп отырғанын да айтқан еді. Бұл мәселе Үкіметтің 11 шілде күнгі кеңейтілген отырысында да көтерілген.

- Президент баға шарықтап өскен кезде жауапты органдар бір-біріне сілтеп, жауапкершіліктен жалтаратынын сынады. Бұл үшін көтерме-тарату орталықтарының жүйесін құрудың маңыздылығын атап көрсетіп, Үкіметке бұл мәселенің бір айдың ішінде оң шешімін табуды тапсырды. Қазір облыстық, қалалық әкімдіктерде сауда және кәсіпкерлік басқарма-бөлімдері бар. Әкімдіктің осы қызметкерлері Үкімет белгілеген шектік бағаларға бақылау орнатса, ең болмағанда, әрбір азық-түлік дүкендеріне, тұрғын үй кешендерінің жарларына жоғарыдағы ескертпені, әлеуметтік маңызды 19 тауардың тізімдерін, оларға қойылған шектік бағаларды нақты көрсетіп, іліп қоюға мүмкіндіктері бар деп есептеймін, - дейді облыстық ардагерлер кеңесі төрағасы.

Сөз соңында аймақ басшысы зейнетке шықса да, қоғамнан қол үзбей елдік істерге араласып жүрген ақсақалдарға тағы да алғыс айтып, олар айтқанөзге де ұсыныс-пікірлердің есепке алынатынын атап өтті.

Кәмшат СӘРСЕНБАЕВА

Суреттерді түсірген

Талант ҚҰСАЙЫН