Бүгін Нұр-Сұлтан қаласында "Маңғыстау Медиа" орталығының басшысы Айсұлу Дутбаеваны Ақпарат және қоғамдық даму министрі Аида Балаева арнайы құттықтады. Құттықтау барысында министр Айсұлу Қабышқызының Маңғыстау өңірінде ақпараттық саланың дамуына қосып жатқан үлесіне тоқталды. Өз қызметіне адал, алдыңғы шепте жұмыс жасайтын журналистердің еңбегін ерекше атап өтті.
"Сіз көтерген өткір тақырыптар қалың оқырманның талқысына жиі түсіп жатады. Елдегі маңызды жаңалықтарды жариялаудағы қызметіңіз еселене, елене берсін. Зор денсаулық, табысты еңбек пен сарқылмас шығармашылық табыс тілеймін" деді Аида Балаева өз құттықтауында.
Өз кезегінде, Айсұлу Қабышқызы Маңғыстауда медиа саласында атқарылып жатқан жұмыстарға тоқталды. Аида Ғалымқызының көрсеткен ілтипатына өзі басқарып отырған ұжым атынан алғыс білдіріп, ақпарат саласында одан әрі де аянбай еңбек ететінін жеткізді.
Сондай-ақ, ел тәуелсіздігінің 30 жылдығына орай Айсұлу Қабышқызы елордадағы "Нұр-Отан" партиясының орталық Аппаратында ҚР Тұңғыш президенті, "Нұр Отан" партиясының төрағасы Елбасы Нұрсұлтан Әбішұлының алғысына да ие болды.
Айта кетейік, «Маңғыстау Медиа» орталығы Маңғыстау баспасөзінің қазыналы қарашаңырағы десе де болады. Жақында ғана жаңа әрі зәулім ғимаратқа көшкен ұжым бірнеше бағытта жұмыс істейді. 2021 жылдан бастап орталық қызметкерлерінің жалақысы 25 пайызға көтерілді. Осыған дейін шешімін таппай келген журналистерге арналған үй мәселесі де қолға алынуда.
Кәмшат Сәрсенбаева
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
