Иорданияның астанасы Амман қаласында бокстан Азия/Тынық мұхиты елдерінің аймақтық іріктеу турнирі ақталды.
11 наурыз күні финалдық жекпе – жектер өтті. Кешкі сессияда үшінші болып шаршы алаңға шыққан Бекзат Нұрдәулетов 81 келіде чемпион атанды. Бұл Қазақстан құрамасының алғашқы алтыны еді.
Бекзат Нұрдәулетов финалда аустралиялық Аокусо Паулоны ұтты. Бірінші раундта төрешілер 3:2 есебімен жеңісті Бекзатқа берсе, ал екінші раундта мықтылығын тағы да дәлелдеді. Үшінші раундта Нұрдәулетов ауыр соққыларымен қарсыласын бір есеңгіретіп алды. Төрешілердің шешімімен Бекзат жеңімпаз атанды. Оған қоса 2020 жылғы Токио олимпиадасының жолдамасына ие болды.
Төрт жылдықтың басты додасы ХХХII жазғы Олимпиада ойындары 24 шілде мен 9 тамыз күндері Жапонияның астанасы Токио қаласында өтеді. Әлемнің 205 мемлекетінен 11200 спортшы қатысады. 33 спорт түрінен 339 медальдар жиынтығы сарапқа салынады.
Әлем көз тіккен байрақты додада Маңғыстаудың атынан Бекзат Нұрдәулетов қатысып бақ сынайды.
Айбек Мұханов,
Мұнайлы ауданы
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
