Ақтауда «Бозжыра» атты Chess party өтті

Ақтау қаласында «Бозжыра» атты Chess party өтті. Ойын ересектер арасында ұйымдастырылды. Оған 10 әуесқой шахматшы қатысты, - деп хабарлайды mangystaumedia.kz сайты.

Chess party-ді «Өнер» галереясы мен «Дебют» шахмат мектебі ұйымдастырды. Мұндағы басты ерекшелік ретінде өнер мен шахмат бір арнаға тоғысты.

«Шахмат тек "Ақ" пен "Қараның" айқасынан ғана тұрмайды. Мұнда білім, өнер, керек десеңіз спорт көрініс табады. Сондықтан да осы ойында әр сала үздіктерінің басын қостық. Олар тек шахматпен ғана шектелмеді. Сондай-ақ өз ісінде де білікті маман екенін дәлелдеген жандар. Шахмат кез келген адамды жетістікке жетелейтінін осыдан аңғарсақ болады», - дейді «Дебют» мектебінің директоры Анвар Шайхымов.

Сонымен қатар ол «Өнер» арт галереясының ұжымына, суретші Аймұрат Танатов пен Тынышбек Балтабаевқа алғысын айтты.

Өңірде өткен шахмат турнирлері бір-біріне ұқсамайды. Былтыр теңіз жағалауында өтсе, жыл басында Лонданға сапар шекті. Енді, міне, қылқалам шеберлерінің туындылары арқылы табиғатпен сырластырып отыр.

«Біраз уақыт бұрын ойын туралы ақылдасқан едік. Анвар екеумізде өз ісімізді жақсы көреміз. Сол себепті де осы шахмат турнирін өткізіп отырмыз. Мұндағы мақсат өнер мен шахматты байланыстыру, өз ісін, хоббиін жақсы көретін адамдарды жинау, оларға ерекше атмосфера сыйлау болатын. Шахмат ұйымдастыруды Анвар өз мойнына алса, суретшілер жеңімпазға арналған басты сыйлықты ұсынды», - дейді суретші Аймұрат Танатов.

Chess partу-ге қатысушылар 5 тур бойынша бақ сынады. Нәтижесінде Михаил Анфимов 1-орын алды. 2-орынды Хасен Муртазин иеленсе, 3-орынды Айрапет Курдоглян мен Марат Алимов қанжығасына байлады. Бас жүлде алған Михаил Анфимовқа «Өнер» галереясындағы мұнаймен салынған Бозжыра туындысы табысталды. Ал 2-орын алған Хасен Муртазинге керамист Асхат Нұрмұхановтың арнайы сыйлығы берілді.

Шара соңында жеңімпаздар ұйымдастырушыларға алғыс айтып, сыйлықтарын «Дебют» шахмат мектебіне сыйға тартты.

Жұлдызай ҚАЛИЕВА

Суреттерді түсірген Талант ҚҰСАЙЫН

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.