Таеквондодан Қазақстан Ұлттық құрама командасының аға жаттықтырушысы Батырбек Естаулетов mangystaumedia.kz сайтына шағын сұхбат беріп, алда өтетін лицензиялық турнирге дайындықтары және жоспарлары туралы айтты.
– Батырбек Жоламанұлы, биылғы мамыр айында Иорданияның Амман қаласында өтетін Азиялық іріктеу турниріне дайындықтарыңыз қалай жүріп жатыр?
– Дайындығымыз жақсы. Ойдағыдай өтіп жатыр. Спортшыларымыздың жағдайы жақсы. Биылдан бастап, тұрақты дайындалып келеді. Амандық болса, 18 наурыз күні Біріккен Араб әмірлігінің Шарджа қаласында оқу-жаттығу жиынына жол жүреміз. Ол жерде екі аптадай боламыз. Одан келгесін Алматыда тағы да оқу-жаттығу жиынымыз болады. Испаниядағы рейтингілік G турниріне де қатысатын ойымыз бар. Пандемия жағдайына байланысты әзірге көп нәрселер анық емес. Бірақ үміттіміз. Жалпы алға қойған жоспарларымыз орындалып келе жатыр.
– Амманға баратын спортшылардың есімі анықталды ма? Осы сайысқа маңғыстаулық Қайрат Сарымсақов қатысуы мүмкін бе?
– Ия, Қайрат қатысады. Бұйырса, мамыр айында өтетін лицензиялық турниріне төрт спортшымыз қатысады. Олар: 67 кг-да Қайрат Сарымсақов (Маңғыстау облысы), +80 кг жоғары Руслан Жапаров (Жамбыл облысы), 49 кг-да Фариза Алдоңғарова (Алматы қаласы), 67 кг жоғары Жансель Дениз (Атырау облысы) барады.
– Лицензиялық турнирде басты қарсыласымыз кімдер болады?
– Вьетнам, Иран, Тайланд елдерінің спортшылары – басты қарсыластарымыз.
– Ендеше, жортқанда жолдарыңыз болсын! Жеңіспен келгейсіздер!
Сұхбаттасқан – Айбек МҰХАНОВ,
Маңғыстау облысы, Ақтау қаласы
Сурет интернеттен алынды
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
