С. Сейітқазынов: Мақсатымыз – бәсекеге қабілетті футболшыларды тәрбиелеу

Бүгінде еліміздің батыс аймағынан танымал – «Ақтөбе», «Атырау», «Ақжайық» футбол клубтары республика бойынша ел біріншілігінде жақсы тартысты өнер көрсетіп келе жатыр. Солардың сапында біздің өңіріміздің «Каспий» футбол командасы да үздіктер қатарында бақ сынап келеді. Өздеріңізге мәлім, өткен жылдың маусым айында «Каспий» командасы премьер-лига клубтары арасында футболдан Қазақстан Республикасы чемпионатының жоғарғы дивизионында Маңғыстау облысының намысын қорғады. Өкінішке қарай елімізде қатаң түрде жүргізілген карантин режиміне байланысты футбол жаңалықтарынан оқырмандарымызды хабардар ете алмадық. Жуырда сәті түсіп, «Каспий» футбол клубының басшысы Санжар Сейітқазыновпен жүздесіп, өңірдің намысын қорғап жүрген команда хақында аз-кем әңгімелескен едік.

– Санжар Дүйсембайұлы, дана халқымызда «Ештен кеш жақсы» дейді. Өткен жылы өңіріміздің танымал «Каспий» футбол клубының жеткен жетістіктері аз болған жоқ. Премьер-Лига клубтары арасында үздік ойын көрсетіп, облыс намысын қорғады. Сұхбатымызды сол сәттерден бастасақ.

– Иә, дұрыс айтасыз. Өткен 2020 жылы Қазақстан Республикасы чемпионатының жоғарғы дивизионында премьер-лига клубтары арасында біздің команда үздік ойын көр сетіп, жақсы жағынан көрінді. Жалпы айтқанда, «Каспий» футбол клубы – Қазақстан бірінші Лигасында ойнайтын футбол клубы. Қазіргі таңда команда құрамына ЕАС-­қа кіретін елдердің келісіміне сәйкес Қазақстан Республикасының аумағында легионерлер болып саналмайтын 5 легионер, Ресей Федерациясының 3 азаматы және 17 қазақстандық футболшы кірді, олардың 8-­і – Маңғыстау футбол мектебінің тәрбиеленушілері. Жаттықтырушылар құрамы 4 шетелдік жаттықтырушыдан және Маңғыстау футбол мектебінің 1 тәрбиеленушісінен тұрады.

Клубтың 2020 жылғы маусымдағы бюджеті 1 миллиард 30 миллион теңгені құрады. КММ мазмұнына премьер-­лига командасы, екінші лига командасы, футзал командасы, футбол орталығы кіреді. Премьер­Лиганың командасы футболдан ҚР чемпионатында 10­-орынға ие болды және еліміздің жоғарғы дивизионында орнын сақтап қалды.

2020 жылдың шілдесінде пандемияға байланысты бюджеттің қысқаруына орай оңтайландыру жүргізілді. Командада жоғары жалақы алатын футболшылардың саны көп болды және олардың орнына жалақы талаптары жоқ ойыншылар келді.

Маусым қорытындысы бойынша Маңғыстау футбол мектебінің тәрбиеленушілері алаңда 3 663 минут ойнады. Бұл лигада үшінші нәтиже болып табылады, көп ойнаған тек «Тараз» ФК мен «Қызылжар» ФК тәрбиеленушілері болды.

Біздің команда жергілікті және шетелдік футбол сарапшыларынан қызықты футбол ойнаушы және көшбасшылардан қорықпаушы ретінде жақсы пікірлер алды. Маусымда еліміздің қазіргі чемпионы «Астана» ФК және екі рет футбол бойынша ҚР кубогының иегері атанған Қызылорда қаласының «Қайсар» футбол командасын көп ұпаймен ұтты.

Тек қана Маңғыстау футбол мектебінің тәрбиеленушілерімен жасақталған екінші лига командасы екінші лига командалары арасындағы турнирде бірінші орын алды және турнир қорытындысы бойынша бірінші лига клубтары арасындағы футболдан Қазақстан Республикасының Біріншілігіне қатысу үшін жолдама алды.

– Бәрекелді, біздің өңір командалары жараған екен. Ақтауда футзал құрамында шетелдік азаматтар ойнай ма?

– Футзал командасы жергілікті тәрбиешілермен жабдықталған, командада Ресей Федерациясының екі азаматы ғана ойнайды, бұл барлық футзал клубтарының ішіндегі ең аз көрсеткіш болып табылады. Қазіргі таңда футзалдан Қазақстан Республикасының чемпионатында 5-­орындамыз.

КММ футбол орталығында футбол бойынша 7 жастан 18 жасқа дейінгі 400­-ден астам бала дайындықтан өтуде, ал 14 жас командасымен «А», «В» және «С» санатындағы лицензиялары бар 17 жаттықтырушы қызмет істейді.

– Түсінікті, ал осы жылға жоспарларыңыз қалай жүзеге аспақ?

– 2021 жылға стадионды премьер-­лига матчтары үшін қайта құру, ауа райынан қорғайтын шатырлар салу, матчтарды түсіру үшін инфрақұрылымды жақсарту жоспарланған. Клубтың ребрендингі жүргізіледі, жастар командасы орналасқан жерін ауыстырады және Жаңаөзен қаласында ойнайтын болады. Бұл Маңғыстау өңірінің географиясын кеңейтуге және футболмен қамтуға мүмкіндік береді.

Сондай-­ақ футбол орталығының балаларымен және жастарымен жұмыс істеуге клубтың селекциялық және әдістемелік жұмысына көмектесетін мамандар тартылатын болады.

Команда өз конференциясында бірінші орынға ие болғандықтан, 2021 жылғы маусымда футболдан бірінші лига Біріншілігіне қатысуға мүмкіндік алды. Бұл – турнирге қатысу болашақта бәсекеге қабілетті футболшыларды тәрбиелеу деген сөз.

Футбол орталығында талантты балаларды іріктеу бойынша селекциялық және әдістемелік жұмысты жолға қоюға көмектесетін мамандарды тарту, УЕФА лицензиясын алу үшін ҚФФ курстарында жергілікті жаттықтырушыларды оқыту, Маңғыстау облысының аудандарында жаңа филиалдар ашу арқылы өңірде балалар мен жасөспірімдер футболын дамыту жоспарланған.

Сонымен қатар Жаңаөзен қаласынан футбол орталығының филиалы ашылады. «Каспий-­М» командасы Жаңаөзен қаласында жаттығып, алдағы уақытта Каспий-Жаңаөзен деген атауға ие болуы мүмкіндігі бар. Алдағы уақытта 3 жас ерекшелігі бойынша футзал орталығы ашылады.

– Таяуда жақсы жаңалық естіген едік... Өңіріміздің мақтанышы, спорт саңлағы Дінмұхамбет Сүлейменов елге оралып, «Каспий» құрамында ойнайды екен.

– Иә, дұрыс айтасыз. Облыстық дене шынықтыру және спорт басқармасының басшысы Қанат Жұмабаевтың қолдауымен, ҚР футзалдан құрама командасының капитаны, УЕФА кубогының 2 дүркін чемпионы және әлем супер кубогының жеңімпазы, 9 дүркін ҚР чемпионы, 4 дүркін ҚР кубогының және ҚР 3 суперкубогының иегері, өлкеміздің мақтанышы Дінмұхамбет Сүлейменов ағамыз «Каспий» футзал клубының ойыншы­-бапкері атанды.

– Әңгімелескеніңізге көп рақмет!

Кенжебек СЕРЖАНҰЛЫ

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.