Ақтауда тұрғындарды вакцинациялау жүріп жатыр

Ақтауда тұрғындар коронавирусқа қарсы «Спутник V» вакцинасын салдырып жатыр, - деп хабарлайды mangystaumedia.kz сайты.

Бүгін "Ясин" медициналық орталығындағы вакцинациялау кабинетінің жұмысымен танысып қайттық.

Дәрігерлер тұрғындарға екпе екпес бұрын міндетті түрде тексеруден өткізіп, сауалнама береді. Тек дәрігердің мұқият тексеруінен соң вакциналауға қарсы көрсеткіштері адамдар ғана жіберіледі. Екпе салдырғаннан кейін 30 минут дәрігер бақылауында болады.

Орталықтың профилактика бөлімінің меңгерушісі Татьяна Хайитова вакцинациялау кабинетінің жұмысымен таныстырып өтті.

Кешеден бастап біздің орталықта коронавирусқа қарсы вакцинациялау пункті жұмыс істеп жатыр. Орталық күнделікті таңғы 8:00-ден 18:00-ге дейін жұмыс істейді. Ал сенбі және жексенбі күндері 9:00-ден 15:00-ге дейін қызмет көрсетеді. Вакцинациялау ерікті түрде жүзеге асады. Вакцина салдырмас бұрын тұрғындар тексерістен өтеді. Ал салдырып болған соң жарты сағат дәрігер бақылауында болады. Сондай-ақ үш күн бойы жергілікті дәрігерлердің бақылауында болады. Вакцинациялау екі этаптан тұрады. Ал екінші компоненті 21 күннен соң салынады. Ал егер тұрғын 21 күннен соң келе алмаса, кейінірек келуіне болады. Бұл иммундық жүйені толықтай қалыптастыру үшін қажет, деді дәрігер.

Ақтау қаласының тұрғыны Нәдір Сүндет ешкімнің күштеуінсіз, өз еркімен вакцина қабылдауға шешім қабылдағанын айтты.

Алдын ала тексеруден өттім. Вакцинаны салдырған дұрыс деп ойлаймын. Өйткені вакцина өзің үшін, отбасың үшін қажет. Вакцина салғаннан кейін ешқандай жанама әсерлерді байқамадым. Өзімді жақсы сезініп тұрмын, деді ол.

Айта кетейік, вакциналар барлық санитариялық-эпидемиологиялық талаптарға сай сақталады.

Сонымен қатар, бүгін "Достық" үйінде де вакцина салатын пункт жұмысын бастады.

Мәдина Керімқұл,

Суреттерді түсірген Талант ҚҰСАЙЫН

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.