Бүгін «Жас Отан» жастар қанаты Маңғыстау облыстық көпбейінді ауруханасының инфекция бөлімшесінде қызмет атқарып жүрген дәрігерлерге «Алғыс пакеттерін» табыстады, - деп хабарлайды mangystaumedia.kz сайты.
Шараға Облыс мәслихатының депутаты, жастар қанатының облыстық филиал төрағасы Наурызбек Мағдатов, Ақтау қалалық мәслихатының депутаты, «Маңғыстау облыстық жастар ресурстық орталығының» директоры Абылай Фазылбек қатысты.
«Бүгін жас отандықтардың бастамасымен республика көлемінде «Дәрігерлерді ардақтайық» акциясы өтуде. Акцияның басты мақсаты - короновирус инфекциясымен күресіп жүрген дәрігерлерге жастар атынан құрмет көрсету, ерен еңбектеріне алғыс айту. Осы ретте біз де республикалық акцияға үн қосып, Маңғыстау облыстық көпбейінді ауруханасының инфекция бөлімшесіне арнайы келдік. Медицина қызметкерлеріне тәтті, жеміс-жидек салынған «Алғыс пакеттерін» тапсырдық», - дейді жастар қанатының облыстық филиал төрағасы Наурызбек Мағдатов.
Аталған акция барысында дәрігерлер де өз алғысын жеткізді.
«Ауруханаға арнайы келіп, өздерінің пейілдерін білдірген жастар қанатына дәрігерлер атынан алғыс айтамын. Осы сәтті пайдаланып барша тұрғындарды сақтық шараларын қатаң сақтауға шақырамын», - дейді Маңғыстау облыстық көпбейінді ауруханасының инфекция бөлімшесінің эпидемиолог маманы Мерей Сисенов.
Қазір акция тек облыс орталығында ғана емес аудандарда да ұйымдастырылып жатыр.
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
