Маңғыстаулық жас спортшы ел чемпионатының алтын жүлдесін жеңіп алды

Жақында Қостанайда кикбокстан жасөспірімдер арасында Қазақстан чемпионаты өтті. Жарыстан маңғыстаулық спортшылар 1 алтын, 1 күміс, 5 қола медальмен оралды. Финалда өнер көрсеткен екі спортшы даМаңғыстау ауданы Қызан ауылының ұландары. Аядай ауылдан шығып, елге өзін мойындатқан спортшының бірі – Әнуар Бақытжанұлы. Ол 75 келіде сынға түсіп, ел чемпионатының алтын жүлдесін жеңіп алды. Осы ретте Әнуар Бақытжанұлымен сұқбаттасқан едік.

– Әнуар, жеңіс құтты болсын! Жарыс қалай өтті?

– Жарыс өте жоғарғы деңгейде өтті. Бірақ оңай болмады. Қарсыластарым мықты дайындықпен келіпті. Карантиннің салдарынан жарысқа шықпағанымызға да 1 жыл өтті ғой. Рингті сағыныппын. Сондықтан бар күшімді чемпион болуға салдым. Алғашқы қарсыласымды айқынбасымдықпен жеңдім. Үш раундтық бәсекенің екінші кезеңінде төреші жарысты тоқтатып, жеңісті маған берді. Финал да оңай болмады. Дегенмен бапкерімнің айтқанын тыңдап, барымды салдым. 3-0 есебімен алтын медаль алдым. Қуаныштымын!

– Ел чемпионатына алғаш рет қатысуың ба, қандай сезім болды?

– Иә, бұл менің Қазақстан чемпионатындағы алғашқы алтыным. Өте ыстық. Өйткені осыған дейін екі рет, яғни 2016, 2019 жылдары қатыстым. Бірақ ол кезде бір қоланы қанжығаға байладым.Сондықтан осы жылы «чемпион боламын» деп мақсат қойдым. Мақсатыма жеттім. Шүкір!

– Жарысқа дайындық барысы қалай болды. Спортшылар үшін ауылда жағдай бар ма?

– Ауылда дайындық жүргізудің өзі қиын. Жағдай жасалмаған. Ауылымыздан шыққан чемпион мен ғана емес. Осыған дейін де көптеген спортшы болды. Бірақ чемпионат алдында қалаға келеміз. Осы жолы да бапкерім Жұбатхан Сайыновпен бірге Ақтауға келіп, 10 күн арнайы дайындық өткіздік.

– Ендігі жоспар, мақсат қандай?

– Қазақстан чемпионы болғаннан кейін әлем чемпионатына жолдама жеңіп алдым. Ендігі бар мақсатым – сол жарыста жеңімпаз атану. Жарыскүзде Италияда өтеді. Алтын алуға бар күшімді салып әзірленемін.

– Әнуар, өзің туралы айтшы, нешедесің, спортпен қай уақыттан бері айналысасың?

– Жасым – 15-те. Қызан ауылында дүниеге келдім. Кикбоксқа келгеніме 6 жыл болды. Спортқа деген қызығушылығыма ағам түрткі болды. Яғни, ағам осы спортқа қатысып жүретін еді. Бір күні мен де ағама еріп, бардым. Сол сәттен бастап маған да осы спорт ұнап кетті. Міне, содан бері осы спортпен айналысамын. Болашағымды да осы спортпен байланыстырамын.

– Әнуар, рақмет. Алдағы жарыстарға сәттілік тілеймін!

Сұқбаттасқан А. ТАБЫЛДЫ

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.