Жетібай ауылының тұрғындары Дәулет Мұқашев аң терісін өңдесе, Жасұлан Егеубай оған сурет салып жүр. Қос жігіт алғашқы туындысында саятшылық өнерді суреттеп үлгерген, - деп хабарлайды mangystaumedia.kz сайты.
Дәулет Мұқашев құсбегілікпен айналысады. Ат құлағында ойнап, тазы ит және қыран бүркіттерімен аңға шығады.
Оның айтуынша, түлкі, қызыл қасқыр, қарсақ аулаған күндері аң терісін тастамай, өңдейді. Теріні тек өңдеп қана қоймай, кәдеге жаратады.
Бірнеше күн бұрын ол ауылдасы, суретші Жасұлан Егеубайға ұсыныс тастап, жаңа кәсіп көзін ашты. Қос шебердің алғашқы туындысы қойдың терісіне салынды.
«Картинаның әлі бояуы кеппеген. Теріні өңдеуді қоспағанда, сурет салуға 3-4 күн керек. Бір қызығы суретті бұл жолы қағазға емес, аңның иленген терісіне салу керек болды. Суретті майлы бояумен салуға 3 күн кетті. Бұл әдіспен сурет салу оңай болған жоқ. Дегенмен нәтижесі керемет. Халықтың көңілінен шықты. Аң терісіне сурет салуды жалғастырамыз», - деді суретші Жасұлан Егеубаев.
Дәулет Мұқашевтың айтуынша, аң терісін илеп, оны кептіруге шамамен 3 айға дейін уақыт керек.
«Алдымен теріні керіп аламыз. Содан кейін теріні тұзға пісіреміз. Тұзға пісіру процесінен кейін малман жағамыз. Оны 20 шақты күн сақтаған дұрыс. Сол уақыт аралығында беті қатады. Тері қураған соң тері бетін жылы сумен тазалап, кептіреміз», - дейді Дәулет Мұқашев.
Шеберлер алдағы уақытта көрме ұйымдастыруды жоспарлап отыр.
Жұлдызай ҚАЛИЕВА
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
