Ақтауда "Baby Skills" жобасы өтті

Ақтау технологиялық қызмет көрсету колледжінде "Baby Skills" жобасы өтті. Шараға "Күншуақ-Ақтау" балабақшасының тәрбиеленушілері қатысты, - деп хабарлайды mangystaumedia.kz сайты.

Жоба барысында балалар "Кім болғым келеді?" деген сұраққа жауап берді. Яғни, екі топқа бөлінген 12 қатысушы "Киім үлгілеу" және "Шаш сәндеу" бағыты бойынша бақ сынады.

Алдымен әр топ қатысушысы өзін таныстырды. Содан соң берілген тапсырма бойынша шаш және киім үлгісін жасады. Жұмыстары әділқазы алқасы тарапынан жоғары бағаланды.

Ұйымдастырушылардың айтуынша, аталған жоба балалардың шығармашылық қабілетін, дағдысын қалыптастырады. Қызығушылығы арттып, ізденуге талпынады.

"Baby Skills" жобасы республика бойынша алғаш рет ұйымдастырылып тұр. Осы жоба арқылы еңбекке балалар қызығушылығының басым екенін байқадық. Жарысқа бір ай бойы дайындалдық. Сол уақыт арасында олардың жаңа істі тез әрі оңай үйреніп алатынын аңғардық. Соның нәтижесінде балалар жақсы көрсеткіш көрсетті", - дейді ұйымдастырушы Әйгерім Шарланова.

"Киім үлгілеу" бағыты бойынша 1-орынды А. Үмбет алды. 2-орын К. Жұмабекке, 3-орын К. Балғаға бұйырды.

Ал "Шаш үлгісі" бағыты бойынша 1-орынды М. Оразбек иеленді. 2-орынды Қ. Нағыметқали алса, жүлделі 3-орынды А. Бурибек қанжығасына байлады. Жобаға қатысып, өз қабілеттерін көрсете білген өзге де қатысушылар арнайы номинациямен марапатталды.

"Бүгін балалар мамандық таңдаудағы алғашқы қадамын жасады. Бастысы барлық мамандықтың маңызды әрі керек екенін білгені дұрыс. Балаларға сәттілік тілеймін", - дейді "Күншуақ-Ақтау" балабақшасының директоры Светлана Бектуровна.

Шара соңында ата-аналар ұйымдастырушыларға өз алғысын айтты. Алдағы уақытта балаларды еңбекке баулитын, қалыптасуына әсер ететін осындай шараларды көптеп ұйымдастыруды ұсынды.

Жұлдызай ҚАЛИЕВА

Суреттер автордан

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.