Каспий жағалауы екі шахмат алаңымен толықты

Каспий теңізінің жағалауы шахмат ойыншылары үшін таптырмас демалыс орнына айналмақ. Жаңадан ашылған шахмат алаңдары жастар көп жиналатын «Астана» сауда орталығы мен I Love Aktau нысанының алдында орнатылған, 14.00-02.00 аралығында жұмыс істейді.

- Жобамыз «Дебют» шахмат мектебі мен MOOZ брендімен танымал балмұздақ сату жүйесінің қолдауымен іске асып келеді. Бұл аймағымызда шахмат ойынын дамытуға арналған бастамалардың бірі ғана, алда әлі талай тың жобалар болады деп сенемін, - дейді «Дебют» шахмат мектебінің директоры Анвар Шайхымов.

Мұндағы қызылды-жасылды бөшкелердің беті жауын-шашынға төзімді арнайы бояумен сырланған.

Спорттық ойынды таза ауада қызықты етіп ойнаудың тәсілін тапқан Анвар Шайхымов соңғы бес жыл ішінде мыңнан астам жас шахматшыларды тәрбиелеп шығарған. Шәкірттері облыс, республика, әлем деңгейінде жүлдегер болып жүр.

- Жас ерекшелігі маңызды емес, себебі шахмат жас талғамайды. Осындай шаралар ұйымдастырудағы мақсатымыз – өңірде шахматқа қызығатындар қатары көбейсе екен, - дейді ол.

Бір ғана «Астана» сауда орталығының алдында жүздеген адамның шахмат ойнағанына куә болдық. Тіпті, бұрын-соңды ойнап көрмегендер де кезекке тұрып, қызығушылық танытты. Әсіресе, қариялар мұндай жаңашылдыққа, уақытты тиімді өткізудің жолын тапқандарына дән риза.

Жоба осы жылдың наурыз айында іске қосылған болатын.

- Бастапқыда тестік режимде енгізілген еді. Тұрғындардың қызығушылығы өте жоғары деңгейде екені байқалды. Ендігі мақсат - жобаны түрлендіріп, әрі қарай дамыту, - деді Анвар Шайхымов.

Кәмшат СӘРСЕНБАЕВА

Суреттерді түсірген Талант ҚҰСАЙЫН

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.