Екпе алуға ынталандыру қажет

Короновирус індеті ел аумағында қайта белең алып, өршіп барады. Науқастар саны артып, провизорлық ауруханаларда төсек орындары күнбе-күн толығуда. Бұған басты себеп - халықтың санитарлық-эпидемиологиялық нормаларды сақтауда салғырттық танытуы, індет ошағын түбегейлі жою мен етек жаюына тосқауыл қою үшін ойлап табылған қуатты қару екпе егу маңыздылығын терең ұғынбауы деп білеміз.

Дүниежүзілік денсаулық сақтау ұйымы дабыл қағуда: вакцинация әлемдік пандемияны бұғаттауға бағытталған, кез келген екпе вирус нәтижесінде орын алатын өлім-жітімнің, ауру үдерісінің аса ауыр, азапты өтуінің алдын алады. Әлемнің әр алуан елінде өндірілген кез келген вакцина жүз пайыз деңгейде вирустан қорғаныс қалқанын құру қабілетіне ие емес, дегенмен тоқсан пайыздық деңгейде ауру белгілерін бәсеңдетіп, оның жеңіл өтуіне қамтамасыз етеді, вирустық инфекция өртінің қаулауына кедергі келтіреді.

Бүгінгі таңда елімізде екпе салдырғандар саны 6 миллионға жуықтады. Ел аумағындағы күрделі эпидемиялық ахуалды ой елегінен өткізіп, ажал аранына жетелейтін вирус залалын терең түйсіне білген азаматтар саналы түрде таңдау жасады. Өз денсаулығын қорғау, отбасы мен жақындарының жеке бас саулығына зардабын тигізбеу, қоғам қауіпсіздігін қамтамасыз ету мақсатында ерікті түрде екпе алуға ниет білдіргендер қатары күн санап артуда. Халық арасында үздіксіз жүргізіліп жатқан вакцинацияның адам өмірін қорғаудағы пайдасы жөнінде ақпараттық-түсіндіру жұмыстары да өз нәтижесін беруде. Сондай-ақ еліміздің әр өңірінде екпе егу науқанын қолдау, халықтың күмәнін сейілту, көтеріңкі көңіл-күй сыйлау, тұрғындарға вакцина егудің ынталандыру жүйесіне жүгіну мақсатында әр алуан байқаулар мен ұтыс ойындары ұйымдастырылуда. Маңғыстау өңірінде бірқатар кәсіпкер азаматтардың қолдау-көмегімен мұндай іс-шара жүйелі түрде ұйымдастырлып келе жатыр.

Ақтау қаласының тұрғыны Николай Кириллов есімді азамат «Спутник-V» екпесінің алғашқы компонентін 6 шілде күні алған. Ол апатты-құтқару және өртке қарсы жабдықтау саласында жетекші маман ретінде қызмет етеді. Екпеден кейінгі кезеңде Николайдың жай-күйі бірқалыпты, ешқандай асқынулар байқалмаған.

«Мен бұл шешімге өз еркімен келдім. Әзірге отау құрғаным жоқ, жеке өзім өмір сүремін. Менің денсаулығым – менің ең басты байлығым. Екпенің алғашқы компонентін «Дина» сауда үйінің жанында орын тепкен жылжымалы егу пунктінде алдым. Медицина қызметкері алдын ала дене қызуымды, қан қысымы мен қанның оттегімен қанығу мөлшерін тексерді. Бірқатар сауалдар қойып, менің денсаулығымның қалыпты екендігіне көз жеткізді. Екпе егу ешқандай қиындық туғызбады. Өзімді керемет сезінемін. Екпенің екінші компонентін 27 шілде күні алдым», - дейді Николай.

Николай екпе алу барысында ғана ұтыс ойынының ұйымдастырылып жатқандығынан хабардар болады. Нар тәуекел деп, байқауда бақ сынап көруге бел буады. Ойын талаптарын дұрыс орындаған Николайға ойын нәтижесінде теледидар табысталды.

«Әрине, мен өте қуаныштымын. Вакцинация науқанын қолдау мақсатында өткізіліп жатқан мұндай байқаулар халыққа керемет көңіл-күй сыйлайды. Екпе алу әркімнің өз еркі. Ешкімді мәжбүрлеу жоқ. Бірақ мен екпенің вирусқа қарсы ең ұтымды қару екендігіне толықтай сенемін», - дейді Николай.

Ал «Келешек» колледжінің директоры, 37 жасар Жұпар Аңдамаова байқаудан тоңазытқыш ұтып алды.

«Ең алдымен айтарым екпені байқауға қатысу үшін емес өз денсаулығымды қорғау мақсатында алдым. «Спутник-V» екпесін 2 шілде күні «СофиМедГрупп» емханасында салдырдым. Сол кезде ойын жайлы естіп, қатысуға шешім қабылдадым. Өткен жұма күні ұйымдастырушылар қоңырау шалып, ұтысқа ие болғанымды хабарлады. Әрине, қуаныштымын. Екпе алғаннан кейін өн бойымда әлсіздік байқалды. Дегенмен учаскелік дәрігер нұсқаулығына сәйкес иммунитетті көтеретін дәрумендерді қолдану нәтитжесінде өзімді бірқалыпты сезінудемін. Ешқандай асқынулар жоқ. Екпе – пандемияны ауыздықтайтын, қалыпты тұрмысымызды қайта орнатуға берілген жалғыз мүмкіндік. Сондықтан жан-жақты, сатылы зерттеулерден өткен екпеге күмәнмен қарауға негіз жоқ», - дейді Жұпар Аңдамасова.

Жұпар Аңдамасованың сөзіне сүйенсек, қазіргі таңда биыл ашылған «Келешек» колледжі ұжымының 80 пайызға жуығы екпе салдырған.

Еліміздегі короновирустық инфекцияға қарсы жаппай вакцинациялау науқанын қолдау мақсатында Маңғыстау өңірінде екпе алғандар арасында ұтыс ойынын ойнатуды ұйымдастырушы Нұрлан Қуанышбай халықты екпе салдыруға ынталандыратын мұндай тәжірибенің оң ықпалын атап өтті. Жуырда ғана Алматының бас санитар дәрігері Жандарбек Бекшин ұтыс ойындары халықаралық тәжірибеде бар шара екендігін тілге тиек етті.

«Қазіргі таңда 17 мемлекет мұндай шараны қолданады. Ол елдердің қатарында АҚШ, Израиль, Франция, Испания, Португалия бар және бұл елдерде осыған ұқсас шаралардың бірқатар түрі бар. Мысалы, АҚШ-та вакцина салдырғандарға қымбат лотерея билеттері беріледі, олар шамамен 20 доллар тұрады. Ол билеттер қомақты соманы ұтып алуға мүмкіндік береді», - деген еді ол.

«Маңғыстаудың бірқатар меценат азаматтары былтыр өңірде орын алған төтенше жағдайды, ел басына төнген ауыр кезеңді ескере отыра екпе салдыру науқанын қолдау мақсатында осындай ойын ұйымдастыруға шешім қабылдады. Ойынның басты шарты – 22 маусымнан бастап шілденің аяғына дейін кез келген екпенің алғашқы компонентін алған азамат қатыса алады. Екпе алған адам мобильді қосымша арқылы арнайы тақтайшада көрсетілген QR-кодты сканерлеп, сайтқа еніп, өзі туралы мәліметтер бағанын толтырып, бізге жолдайды. Сосын 4 саннан тұратын нөмірін сақтап қояды. Әр жұмада менің жеке-инстаграм (@nurekeuanyshbai3007) парақшамда жүргізілетін тікелей эфирде ойын нәтижесі әйгіленеді. Геннератор арқылы кез келген сан таңдалып, қатысушылар базасынан ұтыс иесі анықталады. Байқау басталғалы 30-ға жуық жеңімпаз анықталды. Ойынға он мыңға жуық қатысты. Теледидар, қысқа толқынды пеш, тоңазытқыш, смартфон, әр алуан тұрмыстық техникалар ойнатылды. Өткен аптада демеушілер қатары толығуына орай бір қатысушымыз «Rixos Aktau» қонақ үйіне жолдама ұтып алды. Ұтысқа тігілген ең басты кәде – Ақтау қаласындағы жаңа шағынаудандағы екі бөлмелі үй. Баспана келесі аптада ойнатылады», - дейді Н.Қуанышбай.

Ұтыс ойыны шілденің соңына дейін жалғасады.

Голрох Жеменей

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.