«Шеберханадағы бір күн»: Қоғам белсенділері пікір алмасты

«Өнер» арт-галереясында өңірдің бейнелеу өнері жөнінде пікір алмасу кеші өтті, - деп хабарлайды mangystaumedia.kz.

Әр саланың мамандары мен басқарма басшылары, депутаттар жиналған жиында Маңғыстау облысындағы бейнелеу өнерінің мәселесі талқыланды.

«Маңғыстауда бейнелеу өнері мәдениет саласындағы енді аяққа тұрып келе жатқан ең жас өнер. Суретшілерде идея көп. Мысалы көпқабатты үйлерге мурал салынса қалаға көрік берер еді. Соны іске асыру керек. Оған қолдау керек. Біздің мақсатымыз өлкеміздің мәдениетін арттыру, суретшілердің ынтасын ашу», - дейді суретші Аймұрат Таңатов.

Маңғыстау облыстық мәдениет басқармасының басшысы Пания Сармурзина суретшілерді қолдауға дайын екенін жеткізді. Айтуынша, бейнелеу өнерін насихаттау, дәріптеу мақсатында биыл мамыр айында "Көктем бояулары" суретшілер фестивалі және "Көктем вернисажы" шарасы өтеді. Республикалық суретшілер конкурс-плэнерін қыркүйек айында өткізу жоспарланған. Қараша айында облыстық ХІІ "Маңғыстау жұлдыздары" өнер фестивалінің қорытындысымен "Күзгі вернисаж" ұйымдастырылмақ.

Облыстық мәслихаттың депутаттары Аят Сүгірбай мен Аббат Өрісбаев та сурет саласына қатысты пікір, идеяларын айтты. Пікіралмасу барысында күйші Әлия Қарамұқан күй орындап, барлық өнер атаулы мәдениеттің ажырамас бөлігі екенін атап өтті.

«Суретшілер кең аудиторияны қамту үшін олардың ұсынатын картиналары тек бір бағытта болмау керек. Маңғыстаудың тауы мен табиғатынан басқа да тың дүниелерді дайындау керек деп ойлаймын», - деді «Маңғыстау-Медиа» ЖШС директоры Айсұлу Қабышқызы.

Суретшілер Тынышбек Балтабаев, Аймұрат Таңатов пен Манап Қосан айтылған ой, пікірді тыңдап Маңғыстау облысындағы суретшілер клубын құру туралы шешімге келді. Сонымен қатар, «Мәдениет және өнер» тақырыбын әртүрлі сала мамандарымен талқылайтындарын жеткізді. Өңірдің қылқалам шеберлері алдағы уақытта сурет саласы бойынша жүйе қалыптастыруды көздеп отыр.

Махаббат Нұржанқызы

Суреттерді түсірген Талант Құсайын