«КазАзот» мекемесінің 40 қызметкері вакцина салдырды (ВИДЕО)

Бүгін «КазАзот» АҚ мекемесінде жылжымалы егу пункті ашылды. Мекеменің бас директоры Арман Ахметжанович пен 40-қа жуық қызметкер вакцина салдырды, - деп хабарлайды mangystaumedia.kz сайты.

Вакцина салмас бұрын дәрігерлер қызметкердің дене қызуын, қан қысымын өлшеді. Арнайы анкета толтырып, бұрын қандай аурумен ауырғанын, аллергияның бар-жоғын, қандай дәрі қабылдап жүргенін анықтап алды. Ал әйелдерден жүктілік туралы мәлімет сұралды. Пацинеттің жағдайы жақсы болған да ғана екпе егілді.

Ең бірінші болып «КазАзот» мекемесінің бас директоры Арман Маулешев екпе алды. Содан соң қызметкерлер дәрігер бақылауынан кейін вакцина салдырды.

«Жұмыс барысында адамдармен қарым-қатынас орнатып, келіссөз жүргізіп, іс сапарға шығатын кездер жиі болады. «Вакцина кез келген жағдайда көмектеседі. Тек оған сену керек» дегенді естіген едім. Бүгін вакцина алдым, ем болатынына сенемін. Жалпы мекемеде 1300 қызметкер бар. Сондықтан қорықпай, үлгі болуымыз керек», - дейді Арман Маулешев.

Айта кетейік, ертең тағы да 40 қызметкерге вакцина салынады деп жоспарланып отыр.

Медицина мамандарының айтуынша, вакцина салғаннан кейін суға түсуге, алкогольдік ішімдік ішуге, екпе салған жерге ауырлық түсіруге болмайды. Вакцина алғаннан кейін әртүрлі әсер болуы мүмкін. Атап айтқанда, дене қызуының көтерілуі, әлсіздік, құсу, диарея және тамағы ауырып, бас айналады. Ал кей адамдарда ешқандай ауырсыну болмайды.

Еске сала кетейік, вакцина салу екі кезең бойынша өтеді. Алғашқы дозаны алған адамға 21 күннен кейін қайта салынады. Ал коронавируспен ауырған адамға 6 айдан кейін ғана екпе салынады.

Жұлдызай ҚАЛИЕВА

Суреттер мен видеоны түсірген Талант ҚҰСАЙЫН

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.