Маңғыстау облысы бойынша экология департаментінде "Adaldyq alańy" жобалық кеңсесінің жұмыс жоспары талқыланды, - деп хабарлайды mangystaumedia.kz сайты Маңғыстау облысы экология департаментінің баспасөз қызметіне сілтеме жасап.
Отырысқа төрағалық еткен "Adaldyq alańy" жобалық кеңсесінің төрағасы Әсет Манов өз сөзінде кеңсенің аумақтық бөлімшесінде қоғамдық қабылдау жүргізу, қоғамдық тыңдаулар мен есеп беру кездесулеріне тұрақты қатысу, келісім бойынша сот отырыстарына қатысу, уәкілетті органдармен айына бір рет кездесу ұйымдастыру, сала бойынша жобаның жұмыстары жөнінде бейнероликтер жасап, бұқаралық ақпарат құралдары және интернет ресурстарында орналастыру көзделгенін тілге тиек етті.
Сондай-ақ аумақтық бөлімшенің қызметіне қоғам тарапынан сенім арттыру, имиджін қалыптастыру, сыбайлас жемқорлыққа қарсы тұруға дайын мемлекеттік органдарды бейнелейтін әлеуметтік роликтер түсіру және оны кең көлемде жариялау жоспарда бар екенін айтты. Бұдан бөлек сыбайлас жемқорлық тәуекелдерін анықтау мақсатында ішкі талдау, қоғамда сыбайлас жемқорлыққа қарсы мәдениетті қалыптастыру және оның алдын-алу бағытында мектеп оқушылары арасында сурет салу көрмесін ұйымдастыру, жұмысқа қабылдау кезіндегі конкурстық комиссиялардың құрамына жобалық кеңсе өкілдерінің қатысуын қамтамасыз ету, сыбайлас жемқорлыққа қарсы іс-қимыл заңнамаларын түсіндіру мақсатында семинарлар өткізу жоспарға енгізілген.
Мамандар қоршаған ортаны қорғау мақсатында қала ішінде жасыл желек отырғызу жұмыстарын жүргізу, қызмет алушы кәсіпкерлердің арасында сыбайлас жемқорлық тәуекелдерін анықтау мақсатында әлеуметтік сауалнама жүргізу, ашықтық пен қолжетімділілікті қамтамасыз ету, қоғам мен билік арасындағы кері байланыс орнату, сыбайлас жемқорлықтың алдын-алу бағытындағы ақпараттық парақшалар мен баннерлер орналастыру, «Ашық бюджеттің интерактивті картасы» жобасы бойынша бюджеттің ашықтығын қамтамасыз ету, мемлекеттік қызметтер мен ашықтығына қоғамдық мониторинг жүргізуді көздейді.
Атқарылатын жұмыстар "Facebook" әлеуметтік желідегі «Antikor Live» тікелей эфирі және бұқаралық ақпарат құралдарында жарияланып отырады.
Аталмыш жұмыстарға "Adaldyq alańy" жобалық кеңсесінен бөлек Маңғыстау облысының экология департаменті, орман шаруашылығы және жануарлар дүниесі инспекциясы, «БатысҚазЖерҚойнауы» өңірлік инспекциясы, Маңғыстау облысы бойынша сыбайлас жемқорлыққа қарсы қызмет департаментінің өкілдері атсалыспақ.
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
