Бүгін 7 а шағынауданда алғаш рет Әзербайжан еліндегі «Grandmart» супермаркетінің желісі ашылды, - деп хабарлайды mangystaumedia.kz сайты.
Сауда желісінің ашылуына Маңғыстау облысы әкімінің орынбасары Бекбол Орынбасаров, облыстық кәсіпкерлік және сауда басқармасының басшысы Жанна Тоқбаева, Ақтаудағы Әзербайжан Республикасы консулдығының бас консулы Эльмар Мамедов және қала тұрғындары келді.
Алдымен Маңғыстау облысы әкімінің орынбасары Бекбол Орынбасаров жаңа сауда орнының ашылуымен қала тұрғындарын құттықтап, көршілес елдің бастамасына сәттілік тіледі.
«Қаламызда алғаш рет көршілес елдің сауда желісі ашылып отыр. Аталған дүкенді ашу үшін инвесторлар 460 млн теңге жұмсаған. Қазіргі таңда 60-тан аса адамды жұмыспен қамтып отыр. Бұл өз кезегінді өңірдің экономикалық дамуына септігін тигізеді деп ойлаймын», - деді ол.
Сонымен қатар Ақтаудағы Әзербайжан Республикасы консулдығының бас консулы Эльмар Мамедов қала тұрғындарын жаңа дүкенмен құттықтады. Ол өз сөзінде сауда желісінің қызметі арқылы тұрғындарды жаңа, сапалы әзербайжандық өнімдермен қуантатынын айтты.
«Құрметті ақтаулықтар, бүгінгі шараға келгендеріңіз үшін сіздерге алғыс айтамын. Біз сіздерді әрдайым қуантуға тырасамыз. Ақтаудан ашылып жатқан дүкеніміз елге қызмет етеді деп ойлаймын», - дейді «Grandmart» сауда желісінің иесі Туран бей.
Салтанатты шарадан кейін супермаркет басшылығы мен Маңғыстау облысы әкімдігі арасында әлеуметтік маңызы бар азық-түлік тауарларының бағасын өсірмеу және тұрақты ұстап тұру туралы меморандумға қол қойылды. Содан соң облыс әкімінің орынбасары Бекбол Орынбасаров, облыстық кәсіпкерлік және сауда басқармасының басшысы Жанна Тоқбаева дүкен ішін аралап, баға тұрақтылығына мән берді. Сондай-ақ нан бағасын төмендету керек екенін тілге тиек етті.
Ал қала тұрғындары болса мерекелік көңіл-күймен сауда жасауды бастап кетті. Ұйымдастырушылар тарапынан алғашқы тұтынушылар үшін жеңілдік жасап, сыйлық беріп шығарып салды.
Жұлдызай ҚАЛИЕВА
Суреттерді түсірген Талант ҚҰСАЙЫН
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
