Облыстық мәслихаттың депутаты Наурызбек Магдатовтың бастамасымен, суретшілер Аймұрат Таңатов пен Тынышбек Балтабаевтың қолдауымен "Ардагерлерге құрмет" жобасы аясында Бозжыра шатқалына арнайы саяхат ұйымдастырылды, - деп хабарлайды mangystaumedia.kz.
Өңірдің әр саласында еңбек еткен ардагерлер табиғат жасаған мұражайды тамашалап, ерекше әсер алып қайтты. Саяхатты ұйымдастырушылар Бозжыраға алғаш барған ардагерлерге арнап дастархан жайып, ізгі ниетін білдірді. Ардагер азаматтар жобаны бастап жатқан жастарға сәттілік тілеп, алғысын білдірді.
Біз үлкендерге қол ұшын беруге әрдайым әзірміз. «Қариясы бар елдің қазынасы бар» дегендей, осы кісілерді құрметтеу біздің парызымыз. Облысымызға еңбегі сіңген ардегерлерді аз да болса қуантайық деп осы шараны қолға алып отырмыз, - дейді ұйымдастырушылар.
Бозжыра сапар шеккендер Тынышбек Балтабаевтың аз уақытта салған этюдін тамашалап, шахмат ойынын да ойнап көрді. Домбыраны сөйлеткен күйші Әлия Қарамұқанның да өнері назардан тыс қалмады.
Ал "Ардагерлерді ардақтайық" жобасы аясында "Бозжыра" шатқалына жасалған сапар "Ардагерлерге құрмет" шарасының бастамасы. Жоба бойынша ардагерлерге танымдық саяхаттар және жастармен жаңа форматта кездесулер өткізу жоспарланып отыр.
Махаббат Нұржанқызы
Суреттерді түсірген Талант Құсайын
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
