Жаңаөзен қалалық білім бөлімі мен дәрігерлер өз анасы миы шайқалғанша ұрған 16 жастағы қыздың жағдайы жөнінде мәлімдеді, - деп хабарлайды mangystaumedia.kz.
Жаңаөзен қалалық көпбейінді ауруханасының директорының орынбасары Раушан Өтелгенқызы мектеп оқушысы жабық бас ми жарақатын алған және миы шайқалған деген диагноз қойылғанын хабарлады. Жаңаөзен қалалық білім бөлімінің мәліметінше қыз да, анасы да Қазақстанда уақытша тіркеуде тұрған Ресей азаматтары екенін мәлімдеді.
Жаңаөзен қалалық білім бөлімінің тәрбие ісі жөніндегі бас маманы Сандуғаш Сарбекова анасынан жәбір көрген қызды көршілері терезеден шығарып алып, ауруханаға жеткізгенін айтты. Оның айтуынша, қызымен тіл табыса алмаған анасы жасөспірімді себепсіз ұрған. Ал анасы кінәсін мойындамаған. Мектеп оқушысының ата-анасы бала кішкентай кезінде ажырасып кеткен, ал әкесі Ресей елінің азаматы. Сондай-ақ, Сандуғаш Сарбекова қызды әкесі қамқорлығына алатын болса әкесіне беретіндерін, бас тартса анасын ата-ана құқығынан шектейтіндерін айтып отыр.
Қыз баланың өзімен сөйлескенімізде анасына қайтқысы келмейтінін айтты. Себепсіз ұрып-соғады деп қорқып қалған. Қазір оқушымен психологтар жұмыстанып жатыр. Анасы әзірше баланы өзіне қайтаруға ешқандай әрекет жасап жатқан жоқ, - деді Жаңаөзен қалалық білім бөлімінің тәрбие ісі жөніндегі бас маманы Сандуғаш Сарбекова.
Махаббат Нұржанқызы
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
