Ережесіз жекпе-жек елдің рухын көтерді

Ел тәуелсіздігінің 30 жылдығы аясында Ұлттық жекпе-жектен ересектер мен жастар арасындағы Маңғыстау спортшыларының достық кездесуі Қарақия ауданында өтті.

Жекпе-жекке Ақтау қаласы, Жаңаөзен қаласы, Мұнайлы ауданы және Қарақия ауданының Құрық, Сенек ауылдарының командалары қатысып, ережесіз өнердің есесін қорғады. Халық арасында қазақтың жекпе-жек өнерін кеңінен тарату, салауатты өмір салтын насихаттау мақсатында ұйымдастырылған дүбірлі додаға құрметті қонақ ретінде бокстан 2004 жылы Грекияда өткен Олимпиада ойындарының чемпионы, Вел баркер кубогының иегері, 2005, 2007 жылдарында өткен Әлем Чемпионатының қола жүлдегері, 2006 жылы өткен Азия ойындарының күміс жүлдегері, Қазақстан Республикасына еңбегі сіңген спорт шебері Бахтияр Артаев, Маңғыстау облысы жекпе-жек ұлттық спорт федерациясының құрметті Президенті, бокстан Кеңестік Социалистік Республикалар Одағының спорт шебері Асқар Баймұрат, Маңғыстау облыстық дене шынықтыру және спорт басқармасының басшысы Қанат Жұмабаев және төрешілер мен спорт сүйер қауым қатысты. Достық кездесу аудан басшысы Қыдырберді Беков және құрметті қонақтардың құттықтауынан кейін әнұранмен басталды.

Аудандық балалар және жасөспірімдер спорт мектебінде өткен дүбірлі сайыс кезінде көрермендер мен спортшылардың қауіпсіздігі, санитарлық ережелер қатаң ескерілді. Әр салмақ бойынша жауынгерлерді жекпе-жек аяқталған сәтте бірден марапаттады. Ерегеске толы ережесіз сайыс тартысты өткен сайын көрермен де қызу қошамет көрсетіп отырды. Командалық есеп бойынша бірінші орынды "Қарақия жекпе-жек спорт клубы" жеңіп алса, екінші орын "Мұнайлы жекпе-жек спорт клубы" командасына бұйырды. Ал, үшінші орын Ақтау және Жаңаөзен қалаларының жекпе-жек спорт клубтарының қанжығасына байланды.

Сайысты ұйымдастыру алқасы шараға қолдау көрсеткен "ОңдасынСтрой" ЖШС-нің директоры Б.Боранбаевқа, "Маңғыстау Тазалық" ЖШС-нің директоры" Қарақия аудандық мәслихатының депутаты А. Итыбаеваға, "Назерке" фотостудиясының директоры З. Зайтоновқа және жеке кәсіпкер Н. Оразов пен ерікті жанкүйер Бекқали Танашевқа алғыс білдірді.

Жекпе-жек өнері - ұлан байтақ даламызды ақ найзаның ұшымен, құрыш білектің күшімен қорғап қалған батыр бабаларымыздан қалған аманат. Мұндай сайыстың ауданымызда ұйымдастырылғаны және оған Бахтияр Артаевтай батырдың келгені көпшіліктің көңілін көтеріп, жастардың рухын биіктетті.

Шынар Кендін

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.