С. Трұмов спортшыларды қабылдады

Кеше Маңғыстау облысының әкімі Серікбай Трұмов Қазақстан Республикасының чемпионаттарында жүлдегер атанған спортшылар мен олардың жаттықтырушыларын қабылдады, деп хабарлайды mangystaumedia.kz сайты облыс әкімінің баспасөз қызметіне сілтеме жасап.

«Каспий» кәсіптік баскетбол клубының әйелдер командасы Қазақстан Республикасының Чемпионтатында топ жарып, өлке тарихында тұңғыш рет жүлдегер атанған болатын. Сонымен қатар, «Каспий» кәсіптік волейбол клубының ерлер командасы ҚР чемпионатында күміс жүлдеге ие болған еді. Аймақ басшысы өңір мерейін өсірген Маңғыстау мақтаныштарына алғысын жеткізді.

«Маңғыстаудан шыққан спортшылардың арасында тек өңіріміздің ғана емес тұтас ұлт мақтанышы болғандар аз емес. Солардың ізін жалғаушы спортшы жастарымыздың саны артып келеді. Өткен жылы республикалық жарыстарда 591, халықаралық жарыстарда 67 спортшымыз түрлі дәрежеде жеңімпаз атанды. Жеңісті жолды жалғастырып, биіктен көріне беріңіздер», - деді С.Трұмов.

Жиын соңында спортшылар мен олардың жаттықтырушылары облыс әкімінің алғыс хатымен марапатталды.

Қос жеңімпаз команда ұлттық біріншілікте алған жүлделерін облыс әкімі Серікбай Өтелгенұлына табыстады. «Біздің қыздардың сенсация жасауына облыс басшыларының қолдауы сеп болды. Жергілікті биліктің қолдауын әрдайым сезініп келеміз. Ендігі мақсат – осы қарқынмен алға басып, Ақтауды еліміздің баскетбол астанасына айналдыру»,-деді «Каспий» кәсіптік баскетбол клубының директоры Аракелян Самсон.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.