Жастайынан бағдарламалау тілін жете меңгерген ағайынды Руслан мен Тимур Шматеев есімді жеткіншектер әр алуан форматтағы медиафайлдар мен жазбаларды алмасуға арналған WhatsApp мобильдік қосымшасы мен Telegram жүйесінде арнайы бот ойлап тауып, іске қосты. Боттордың бір ерекшелігі теңіз суының температурасын бір мезетте анықтап, қос месенджерде де жауап қатады. Бот ашық ақпараттық серверлермен ұштастырылған, теңіз суына қатысты мағлұматты лезде жинақтап, сауал қойған тарапқа ұсынады. Бұл 13 жасар Русланның ойлап тапқаны, ал 11 жасар Тимур жедел аударма жасау мүмкіндігіне ие ботты қолданысқа ұсынды. Теңіз жағалауындағы қала тұрғындары жаңа боттардың көмегіне лезде жүгінді. Бір-екі тәулік ішінде жүздеген сауалдар жолданған екен.
«Жаз маусымында теңіз суының температурасын білу үшін ғаламтор көмегіне жиі жүгінеміз. Ал боттар бұл істі мүлдем оңтайландырды. Watsapp пен Telegram қосымшасы арқылы тез жауап аласыз. Бұл әсіресе теңіз табиғатын тамашалауға келген туристер арасында танымалдыққа ие болмақ. Аудармашы боттар да бүгінгі таңда жоғары сұранысқа ие. Әрі боттың аса бір ерекшелігі ауқымды аударма мәтінімен жұмыс жасауға мүмкіндігі жетеді», - дейді қос талапкердің анасы Айнұр.
Руслан мен Тимур қарапайым отбасыда дүниеге келген. Екеуі де 12 шағынаудандағы №12 орта мектепте білім алады. Компьютерлік бағдарламалау тілін меңгеру сабақтан тыс уақытта аса қызығушылықпен айналысатын сүйікті хоббиі. Ал бұл істе басты ұстазы – Youtube арнасындағы онлайн-дәрістер. Руслан мен Тимурдың ата-анасы IT-кеңістігінен бөгде салада қызмет атқарады.
«Кей кезде балаларымыздың қай тілде сөйлесіп жатқанын түсінбей қаламыз. Жаңа толқын - жас буынның қиялы ұшқыр, ойы жүрдек. Ілеспей жатамыз. Тілі де таңсық», - деп күлімдейді олар.
Ізденімпаз, терең білімге талпынысы биік талапкерлер бұл бағыттан таймаса ақпараттық технология саласында талай белесті бағындырары айқын. Ал зерек те зерделі жеткіншектердің өнертабысын ортақ игілікке бағыттауға қолдау көрсетуге бейіл жандар болса, нұр үстіне нұр болмақ.
Голрох ЖЕМЕНЕЙ
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
