Ақтауда «Жас батыр кубогы» сарапқа салынып жатыр

Ақтауда дзюдодан жасөспірімдер арасында «Жас батыр кубогы» ашық республикалық турнирі өтіп жатыр. Байрақты бәсеке 10 наурыз күні басталған. Жарыстың алғашқы күнінде маңғыстаулық балуандар 6 алтын, 6 күміс және 12 қола жүлдені еншіледі, - деп хабарлайды mangystaumedia.kz сайты.

Турнирге әр аймақтан келген 600-ге жуық спортшы қатысып жатыр. Бірінші күні 2006-2007 жылы туған жасөспірімдер 9 салмақ бойынша боз кілемде белдесті. Ал бүгін 2008-2009 жылы туған жасөспірімдер күресуде.

Айта кетейік, жыл сайын ұйымдастырылатын «Жас батыр кубогы» биыл алғаш рет республикалық деңгейде өтіп жатыр.

Ашық республикалық турнирдің ашылу салтанатына Маңғыстау облыстық дене шынықтыру және спорт басқармасы басшысының м.а Қанат Жұмабаев және «Жас батыр» спорт мектебінің директоры Манарбек Бисекенов сөз алып, жарысқа қатысатын балуандарға сәттілік тіледі.

Салтанатты шара барысында әлемдік аренада бой көтеріп, жеңіс туын желбіретіп жүрген Сұңғат Жұбатқан және Ақниет Тұрдан ҚР дзюдо федерациясының «3 дан» сертификаты, яғни халықаралық дәрежедегі спортшы атағымен марапатталды.

Жұлдызай ҚАЛИЕВА

Суреттерді ұсынған «Жас батыр» спорт мектебі

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.