Маңғыстаулық дзюдошылар Алматы облысында шеберліктерін шыңдауда

Дзюдодан Қазақстан ұлттық құрама командасы оқу-жаттығу жиынын өткізіп жатыр. Онда маңғыстаулық дзюдошы Руслан Мұсаев, Ақниет Тұрдан және Анна Казюлина шеберлігін шыңдауда, - деп хабарлайды mangystaumedia.kz сайты.

Оқу-жаттығу жиыны Алматы облысындағы «Ақбұлақ» олимпиадалық орталығында өтуде. 29 қазан күні басталған жаттығу жиынға 20-дан астам дзюдошы қатысып жатыр. Ересектер арасындағы оқу-жаттығу жиыны 22 қарашаға дейін жалғасады.

ҚР жастар құрамасының және Маңғыстау облысының ересектер құрамасының аға бапкері Айбек Имашевтың айтуынша, қазан айынан бастап олимпиадаға ұпай жинайтын халықаралық жарыстарға рұқсат берілген болатын. Ал желтоқсанның 17 – 21 күндері Қазақстан Республикасының чемпионаты өтеді деп жоспарланып отыр.

Сонымен қатар 15 қараша күні Алматыда дзюдодан жастар құрамасы арасында жаттығу жиын өтеді. Оған маңғыстаулық 8 спортшы қатысады деген болжам бар.

Еске сала кетейік, бұған дейін де маңғыстаулық дзюдошылар Айбек Имашевпен бірге Алматы қаласындағы «Ақбұлақ» олимпиадалық орталығында өз шеберліктерін шыңдап келген болатын. Қазіргі таңда татами шеберлері өз дайындықтарын жалғастырып, жарысқа сақадай сай отыр.

Жұлдызай ҚАЛИЕВА

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.