Ақтауда «Сұңқар» балалар спорт клубы ашылды

«Бизнестің жол картасы-2025» бизнесті қолдау мен дамытудың мемлекеттік бағдарламасы аясында жеке кәсіпкер Көпжасар Елубек Дауылбекұлының бастамасымен спорт саласын дамыту мақсатында Ақтау қаласында «Сұңқар» балалар спорт клубы ашылды, деп хабарлайды mangystaumedia.kz сайты Ақтау қаласы әкімдігінің баспасөз қызметіне сілтеме жасап.

«Сұңқар» спорт клубы Ақтау қаласының 3 шағын аудан 207 ғимаратында орналасқан. Жалпы аумағы 1805 шаршы метр, ғимараттың аумағы 592 шаршы метр. Аталмыш спорт клубында 2 зал орналасқан, сонымен қоса спорт клубы бұрынғы ғимаратынан күрделі жөндеуден өткен.

Спорт клубының мақсаты - балаларды спортпен айналысуға тарту және бұқаралық-спорттық жұмыс арқылы салауатты өмір салтын қалыптастыру.

Спорт клубы күніне 300 спортшыны қамти алады. Сағат 09.00 - 18.00-ге дейін спортпен шұғылданатын балаларға тегін, ал 18.00-ден бастап, ересектерге ақылы түрде қызмет көрсетеді.

Сонымен қоса, әлеуметтік жағдайы төмен отбасыларының балаларына спорт клубына қатысу тегін. Спорт клубының залдары қажетті жабдықтармен жабдықталған.

Аталмыш спорт клубында 4 спорт түрімен шұғылдануға болады. Олар: самбо күресі, жекпе-жек сайысы, жауынгерлік самбо және таеквандо. Қазіргі таңда спорт клубында облыстық, республикалық, халықаралық жарыстарда орын алып жүрген бапкерлер қызмет етуде.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.