Ақтауда діни мереке кезінде теңіз жағасында суға түсуге шектеу қойылды

Маңғыстауда православ христиандарының мерекесіне орай теңіз жағасында жаппай суға түсу рәсіміне шектеу қойылды. Бұл туралы Маңғыстау облысының қоғамдық коммуникация орталығында өткен брифингте МО Дін басқармасының басшысы Мақсатбек Маханбетов мәлім етті.

«Аймақтағы эпидемиологиялық жағдайға байланысты Маңғыстау облысының Бас санитарлық дәрігердің 2021 жылғы 8 қаңтардағы № 1 «Маңғыстау облысының аумағында коронавирус инфекциясының алдын алу туралы» Қаулысының 6-тармағы 3-тармақшасына сәйкес діни бірлестіктерге ұжымдық бұқаралық іс-шараларды өткізуге тыйым салынғанын негізге ала отырып Маңғыстау облысының әкімдігімен Православ христиандарының «Шомылдыру Рәсімі» мерекесі күні діни жоралғыларды орындау үшін теңіз жағасында жаппай суға түсу рәсімінің өткізілуіне шектеу қойылғанын хабарлаймын»,-деді Мақсатбек Маханбетов.

Сондай-ақ Ақтау қалалық «Благовещенск Приходы Орал Епархиясы» жергілікті православиелік діни бірлестігінің протоиерейі Игорь Выриков суға түсу рәсімін теңіз жағасында жасамауының себебін түсіндірді.

«Діни бірлестіктерді және облыс тұрғындарын күшейтілген санитарлық-дезинфекциялық режимді сақтауға және өміріңізге қауіпті індеттен сақтануға шақырамыз», - деді протоиерей Игорь Выриков.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.