Маңғыстау облыстық мәслихаттың алғашқы сессиясы өтті

Бүгін VII шақырылымдағы Маңғыстау облыстық мәслихаттың алғашқы сессиясы өтті. Отырысқа Маңғыстау облысының әкімі Серікбай Трұмов қатысты, - деп хабарлайды mangystaumedia.kz сайты.

Алдымен облыстық мәслихат депутаттарына куәлік берілді. Содан соң сессияның секретарияты, санат комиссиясы сайланып, сессияның жұмыс регламенті бекітілді.

Ал облыстық мәслихаттың бірінші сессиясы төрағалығына Бекмұрат Қыдырбайұлы Жүсіпов сайланды. Әрі қарай отырысты сессия төрағасы өткізді. Ол VII шақырылымдағы Маңғыстау облыстық мәслихаттың сессия хатшысын сайлауды ұсынды. Осы ретте облыстық мәслихат депутаты Елубай Джакаевич «Nur Otan» партиясы Маңғыстау облыстық саяси кеңесі бюросының ұсынысымен және Маңғыстау облыстық мәслихатында «Nur Otan» партиясы депутаттық фракциясының шешіміне сәйкес облыстық мәслихаттың хатшысы болуға Нури Лазарұлы Тумышевтың кандидатурасын ұсынатынын айтты. Бұл ұсынысты қалған депуттатар да бірауыздан қолдады.

Сессия барысында VII шақырылымдағы Маңғыстау облыстық мәслихаттың тұрақты екі комиссия құру туралы шешім қабылданды. Оның бірі – экономика және бюджет болса, екіншісі – әлеуметтік мәселелер және заңдылық пен құқықтық-тәртіп комиссиясы. Соған сәйкес тұрақты комиссия мүшелері де таныстырылды. Айта кетейік, облыстық мәслихат экономика және бюджет мәселелері жөніндегі тұрақты комиссияның төрағасы болып Бекмұрат Қыдырбайұлы Жүсіпов тағайындалды. Ал әлеуметтік мәселелер және заңдылық пен құқықтық-тәртіп жөніндегі тұрақты комиссиясының төрағасына Себасов Марат Бакбергенович сайланды.

Отырыс соңында облыстық экономика және бюджетті жоспарлау басқармасының басшысы Марина Әлібекова Маңғыстау облысын дамыту 2021 – 2025 жылдарға арналған бағдарламасын таныстырды. Облыстық мәслихат депутаттары алдағы уақытта аталған бағдарламаны қарап және талқылайтынын айтты. Ал облыс басшысы Серікбай Трұмов жаңа сайланған депуттартарға сәттілік тілеп, өңірді дамытуда белсене жұмыс істеуге шақырды. Сондай-ақ алдағы жоспарларымен бөлісті.

Жұлдызай ҚАЛИЕВА

Суреттерді түсірген Талант ҚҰСАЙЫН

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.