Ақтауда «Жас батыр кубогы» өз мәресіне жетті

Ақтауда дзюдодан жасөсірімдер арасындағы «Жас батыр кубогы» ашық республикалық турнирі өз мәресіне жетті. Жарыста маңғыстаулық дзюдошылар 12 алтын, 12 күміс және 26 қола медальді қанжығасына байлады, - деп хабарлайды mangystaumedia.kz сайты.

Турнирге 2006-2007 жылдары және 2008-2009 жылдары туған жасөспірімдер қатысты. Олар 9 салмақ дәрежесінде бақ сынап, боз кілемде белдесті.

Жарыс барысында арнайы Қырғызстан елінен шақыртылған халықаралық дәрежедегі төрешілер Асель Кабылбекова, Зарима Торогелдиева және халықаралық дәрежедегі төреші Данияр Айтымбетов балуандардың біліктілігіне баға беріп, төрелік етті.

Екі күнге созылған тартысты бәсекеде жеңіске жеткен балуандар «Жас батыр кубогын» иеленді.

Айта кетейік, жыл сайын ұйымдастырылатын «Жас батыр кубогы» биыл алғаш рет республикалық деңгейде өтті. Турнирге 600-ге жуық спортшы қатысты.

Жұлдызай ҚАЛИЕВА

Суреттерді ұсынған «Жас батыр» спорт мектебі

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.