Наурыз: Ақтау қаласын безендіруге қанша қаржы жұмсалады

© Фото архивтен (2019 жыл). Наурыз мерекесі

Ақтау қаласын 8 наурыз халықаралық әйелдер күні және 21 – 23 наурыз мерекесі қарсаңында безендіруге 4 699 856.00 теңге бөлінген. Бүгін «Ақтау қалалық тұрғын-үй коммуналдық шаруашылығы бөлімінің» тапсырыс беруімен басталған конкурс аяқталды. Жеңімпаз – «Phantom 1» ЖШС.

Қаланы безендіру жұмыстарына өтінім қабылдау 17 ақпан күні басталды. Сегіз күнге созылған сатып алу конкурсына 4 мекемеден өтініш келіп түскен.

Мемлекеттік сатып алу порталының мәліметтеріне сенсек, ең төменгі баға ұсынған алматылық «Phantom 1» ЖШС жеңімпаз атанды. Яғни, ол мерекеге орай қаланы безендіруді 3 876 517 теңгеге бағалапты. Ал «Apple City 1» ЖШС 3 877 000 теңге ұсынып, екінші орын алған.

Қаланы безендіру жұмыстарының техникалық ерекшеліктеріне мән берсек, 2019 жылы жарияланған құжаттардан айырмашылығы айтарлықтай көп емес. Еске сала кетейік, 2019 жылы бұл жұмыстарға 7 864 000.00 теңге бөлінген еді.

8 наурыз халықарарлық әйелдер күні және 21 – 23 «Наурыз мейрамы» мерекелік күндерге арналған «Қаланы безендіру» жұмыстары конкурсы (2019 жыл)

Десек те, жеңімпаз атанған «Arystan corporation 1» ЖШС 4 644 444 теңгеге орындаған. Бірақ әкімдіктің 7 млн-нан аса қаржыға бағаланған жұмысы неліктен арзан бағаға орындалғаны қызық.

Хош. Биылғы безендірудің техникалық ерекшелігіне шолу жасайық. Мердігер мекеменің жауапкершілігіне билбордтарды баннерлермен безендіру, кермелі баннерлерді дайындау және орнату, мерекелік күндерге тутұғырларға мемлекеттік туларды ілу, «Салют» кәрзеңкесін безендіру, 18 тутұғырлы және 12 тутұғырлы кәрзеңкені безендіру сынды жұмысты жүктеген. Одан бөлек әлеуетті өнім берушіге арналған талаптарды да таныстыруды ұмытпаған.

Айта кетейік, 8 наурыз халықаралық әйелдер күні мерекесінің безендіру жұмыстары 6 – 10 наурызда жүргізіледі. Ал Наурыз мерекесіне арналған жұмыстар 11 наурыздан басталады.

Жұлдызай ҚАЛИЕВА

Суретті түсірген Талант ҚҰСАЙЫН

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.