Ақын Есенғали Раушанов өмірден өтті

Танымал жазушы, ақын Есенғали Раушанов өмірден өтті. Бұл туралы Қазақстан Жазушылар одағының бірінші орынбасары ақын Ақберен Елгезек өзінің Facebook парақшасында жазды, деп хабарлайды mangystaumedia.kz.

«Қадірлі ағайын! Қазақтың аса көрнекті ақыны, Қазақстан Республикасы Мемлекеттік сыйлығының лауреаты Есенғали Раушановтан айырылып қалдық.

Алла алдынан жарылқасын.

Асыл рухы бейіштің төрінде шалқысын», - деп жазды ол.

Есенғали Раушанов 1957 жылы 5 қазанда Қарақалпақ АКСР-інде туған. Қазақстан Республикасының Мемлекеттік сыйлығының лауреаты, Қазақстан Ленин комсомолы сыйлығының лауреаты, Парасат және Құрмет ордендерінің иегері атанған.

Оның алғашқы жыр жинағы «Бастаудан» басталды. Содан соң «Келінтөбе», «Шолпан жұлдыз туғанша», «Ғайша бибі», «Қара бауыр қасқалдақ» атты жыр кітаптары жарық көрген. Ұлттық болмыс, ұлттық психология, этнография ақын өлеңінің ішкі өріміне образдық бояу болып сіңген «Қозының бүйіріндей тойып емген төбелер», «Қатарланған қара нардай азайған қариялар», «Тұлыпқа кеп иіген аруанадай сенің суық ерніңнен іздедім от» және т.б шығармалары бар.

Ақын, жазушы Есенғали Раушановтың драматурия саласындағы алғашқы шығармасы - «Құнанбай мен Абай» пьесасы. Аталған туынды Маңғыстаудағы Н. Жантөрин атындағы музыкалық драма театрында алғаш рет сахналанған болатын.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.