Әскери қызметшілер қарттар үйінің аумағына 150-ге жуық көшет отырғызды

Мамыр айында үш бірдей айтулы мереке атап өтіледі. Аталған мерекелер қарсаңында әскери теңізшілер қарттар үйіне барып, сенбілік ұйымдастырды. Қарттар үйінің аумағын тазалап, 150-ге жуық көшет отырғызды, деп хабарлайды mangystaumedia.kz.

- Бұл шараға әскерилермен қатар, олардың отбасы мүшелері де қатысты. Үлкенді сыйлау, оларға құрмет көрсету – ата-бабадан келе жатқан салтымыз. «Қарты бар елдің қазынасы бар» дегендей қарияларға қамқор болуымыз керек, - деді әскери теңіз базасының матросы Мөлдір Пирова.

Карантин режиміне байланысты және адамдардың топтап шоғырлануын болдырмау үшін 10-ға жуық қана әскери қызметші отбасымен бірге көшет отырғызу жұмыстарына қатысты.

- Қарттар – бір кезде халық игілі, келешек ұрпақ үшін аянбай еңбек еткен аға буын. Еліміздің өсіп-өркендеуіне, ынтымақта өмір сүруіне өз үлестерін қосқан жандар. Сондықтан да олардың өмір жолдары - бүгінгі ұрпаққа өнеге, таптырмас қазына», - деді әскери-теңіз базасындағы әскери қызметшілердің отбасы мүшелерімен жұмысты ұйымдастыру қызметінің бастығы Әсел Хайрушева.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.