Ақтаудағы "Оқушы" орталығында белгілі азамат, қоғам белсендісі, ұстаз, журналист, аудармашы, шахматшы Темірхан Түйтеев (1952 - 2007) атындағы оқушы балалар арасында «Шахмат – менің әлемім» атты ІІ ашық қалалық турнир өтті.
Осы "Оқушы" орталығы мен қаладағы шығармашылық клубтары шәкірттерінің арасында өткен жарыстың ашылу салтанатында қалалық дене шынықтыру, спорт және туризм бөлімінің басшысы Болат Досов, орталық директорының м.а. Самира Қанатбекова құттықтау сөз сөйлеп, ізгі ниеттерін білдірді. Марқұм Т.Түйтенің сыныптас құрдастары, жолдастары, ауылдас шәкірттері естеліктерін айтып, жақсы тілектерін жеткізді. Содан кейін қонақтар Темірхан Түйтеев атындағы шахмат кабинетінің ашылуына қатысты.
Жас шамасына қарай екі топқа бөлініп, «Кароль», «Зерде», «Толқын», «Достық», «Ұлан» командаларының атынан сайысқан балалар өзара ақыл-ойдың ұшқырлығы мен есепке жүйріктігін сынасты. Жеребе жолықтырған қарсыластарын шаршы тақта үстіндегі «патшалар ойынында» жеңген жеңімпаздарға, жүлдегерлерге және барлық қатысушыларға лайықты марапаттар жасалып, сыйлықтар берілді.
- «Жақсының аты өлмейді» деген рас қой, өнегелі азаматты еске алуға арналған турнир әйелдер мерекесі қарсаңында өткізіліп отыр. Жарыстың демеушілері – марқұмның жары Оңай апа мен қызы Жұмагүлге ризамыз. Т.Түйтеев атындағы ашық қалалық турнирдің алдағы уақытта да дәстүрлі жарысқа айналуына тілектеспіз. Осы турнирдің өтуіне қолдау көрсетіп, атсалысқан барша азматтарға алғыс айтамын, - дейді «Оқушылар» орталығы шахмат үйірмесінің қосымша педагогы Ақберді Қалиев.
Мұрат ЖЕТЕКБАЙ
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
