Екі самбошы Әлем және Азия чемпионатына жолдама алды

Кеше Семей қаласында үш күнге созылған самбо күресінен жастар арасында ҚР чемпионаты аяқталды. Байрақты бәсекеде маңғыстаулық самбошылар топ жарды, - деп хабарлайды mangystaumedia.kz сайты.

Атап айтқанда 50 келі салмақта Айкүн Рахметова, +98 келі салмақта Мұхаммед Зұлхарнаев алтын алды.

Ал Мерейлім Кеңесбек 47 келі салмақта сынға түсіп, күміс жүлдені қанжығаға байлады.

71 келі салмақта Нұрбек Қуанышұлы мен 88 келі салмақта Баубек Әбубәкір жүлделі 3-орынды иеленіп, қола медаль алды.

"“Жас Батыр” спорт мектебінің спортшылары Қазақстан республикасының чемпионатында екі Әлем және Азия чемпионатының жолдамасын ұтып алды. Бұған дейін 58 кг салмақта Домбаев Нұркен, 47 кг салмақта Кеңесбек Мерейлім алтын алқа иеленіп, жолдама алған болатын. Енді 2021 жылы маңғыстаулық төрт самбошы қазан айында Монголияның астанасы Ұлан-Батырында өтетін Әлем чемпионатына қатысады", - дейді "Жас батыр" спорт мектебінің басшысы Манарбек Бисекенов.

Ал 4-6 маусым күндері Өзбекстанның астанасы Ташкент қаласында өтетін Азия чемпионатында ел намысын қорғайды.

Осылайша маңғыстаулық спортшылар боз кілемде белдесіп, командалық есепте 3-орынға тұрақтады. Жамбыл облысы 2-орын алса, 1-орынды Шығыс Қазақстан облысы иеленді.

Жұлдызай ҚАЛИЕВА

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.