Қарақия ауданының әкімі халық алдында есеп берді

Бүгін аймақ басшысы Қарақия ауданы әкімінің халық алдындағы есеп беру жиынына қатысты, - деп хабарлайды mangystaumedia.kz сайты Маңғыстау облысының әкімдігіне сілтеме жасап.

Алдымен аудан әкімі Қыдырберді Беков өзінің жылдық жұмысын баяндап, ауданда атқарылып жатқан нақты істер мен алға қойған міндеттерге тоқталды. Жұмыспен қамту, мал шаруашылығы, кәсіпкерлік салаларында қордаланған мәселелер талқыланып, тұрғындар тарапынан түскен өтініштерді ескеруге уәде етті.

Қарақия - өңірдегі қарқынды дамып келе жатқан аудандар қатарында. Өткен жыл қарақиялықтар үшін нәтижелі болды. Әсіресе, ауыл шаруашылығы кең етек жайған. Бұл салаға тартылған инвестиция көлемі 2018 жылмен салыстырғанда бірнеше есеге артқан. «Алдағы жылы фермерлік жылыжайлар көлемін 1,5 гектарға арттыруды жоспарлап отырмыз», - деді әкім өз сөзінде.

«Аграрлық несие корпорациясы» бойынша да оң өгерістер байқалады. Аудандық қазынаға 13,5 млрд теңге түсіп, кірістер 101,1% орындалды. Қазақтың екінші теңіз порты саналатын Құрықта барлығы – 1,3 млн тонна жүк тасымалданды. Автокөлікпен тасымалданған жүк көлемінің саны 234 мың тоннаны құраса, паромдық кешен арқылы 11 мыңға жуық жолаушы тасымалы ұйымдастырылды. Ал Болашақ станциясы арқылы барлығы 1,2 млн тонна жүк тасымалданды. Бұл ауданың денсаулық сақтау саласы оң көрсеткішке ие.

Аудан бойынша орталықтандырылған ауыз сумен қамту бүгінгі күні 95 % құрап отыр. Ал елді-мекендердің көшелерін жарықтандыруға 147 млн. теңге бөлініп, тиісті жұмыстар жүргізілді. Жұмыспен қамту мәселесі бойынша 2 662 жаңа жұмыс орындары құрылып, 2138 – тұрақты, 524 - уақытша жұмысқа орналасты. Бүгінгі күні 2135 жұмыс жасап тұрған кәсіпкерлік субъектілері арқылы төрт мыңға жуық адам жұмыспен қамтылды. Бизнесті қолдаумен дамытудың бірыңғай бағдарламасы арқылы екінші деңгейлі банктерден 12 кәсіпкер 227,5 млн теңгеге несие алды. Нәтижесінде 15 жұмыс орны ашылды.

Қарақия ауданының биылғы жылғы жоспары – нық, мақсаты – айқын.

Қорытынды жиыннан соң аудан әкімі тұрғындар тарапынан түскен сауалдарға жауап беріп, өңір басшысы жиында көтерілген мәселелердің жүзеге асырылу барысын өзі қадағалайтынын жеткізді. Алда межелі жұмыстарды кезең-кезеңімен жүзеге асыру жалғаса бермек.

Маңғыстау Медиа

Редакциялық пікір мақала авторлары мен оқырмандардың пікірлерімен сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты / Мнение редакции может не совпадать с мнением авторов статей и читателей. Ответственность за достоверность изложенной в статьях и комментариях информации несут авторы.