Маңғыстауда туберкулезбен ауыру деңгейі 3,6% төмендеген

Былтыр Маңғыстауда туберкулезбен аурушаңдық деңгейі 6,3%, өлім жітім деңгейі 36,4% төмендеген. Ал 2022 жылдың 3 айының қорытындысы бойынша облыста сырқаттанушылық деңгейі 3,6% - ға төмендеген. Бұл туралы Қоғамдық коммуникация орталығында өткен брифингте Маңғыстау облыстық фтизиопульмонология орталығының директоры Қуат Титанов айтты, - деп хабарлайды mangystaumedia.kz сайты.

- Соңғы 10 жылда Маңғыстау облысында туберкулезбен аурушаңдық пен өлім-жітім деңгейі төмендеген. Мәселен, 2012 жылы туберкулезбен сырқаттанушылық көрсеткіші 100 мың халыққа шаққанда 81,2 құраса, 2021 жылы 100 мың адамға шаққанда 43,1 құрады. Яғни, төмендеу қарқыны - 47,0%. 2012 жылы өлім-жітім көрсеткіші 100 мың халыққа шаққанда 7,9 құраса, 2021 жылдың қорытындысымен бұл көрсеткіш 100 мың халыққа шаққанда 0,7 құрады, яғни төмендеу қарқыны - 91,1 %", - деді Қуат Титанов.

Сонымен қатар биыл 1-тоқсанында фтизиопульмонология орталығының әр бөлімшесіне 83 науқас емдеуге жатқызылды. Олардың 36-ы дәрілік тұрақтылығы бар науқас, 41-і төзімділігі сақталған науқас, 4 науқас балалар мен жасөспірімдар бөлімшесіне жатқызылды. Сондай-ақ, пациенттер стационарлық ем алуға Алматы қаласындағы Ұлттық ғылыми фтизиопульмонология орталығына да жіберіледі.

- Туберкулездің белсенділігі жойылған адамдар, сауықтыру емін алу үшін облыс көлемінде Тұщыбек ауылындағы Е.Оразақов атындағы шипажайға, республикалық «Бурабай» оңалту орталығына жіберіледі. Былтыр 48 адам «Бурабай» оңалту орталығына жіберілді. Е.Оразақов атындағы шипажайға 35 адам қалпына келтіру курсына барса, 49 пациент демеу фазасында ем қабылдады, - деді Маңғыстау облыстық фтизиопульмонология орталығының директоры Қуат Титанов.

Айта кетейік, алдағы уақытта санаторлық үлгідегі балабақшаларда мектеп жасына дейінгі диспансерлік есепке алу тобының балалары химиопрофилактикалық ем және оңалту курстарынан өтеді. Осы уақытқа дейін 39 бала оңалту курсынан өтті. Туберкулез ауруын анықтау, есепке алу, сондай-ақ амбулаторлық сатыда емдеу, диспансерлік бақылау науқастың тіркелген жері бойынша медициналық ұйымдарда орындалды.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.