Маңғыстау ауданына қарасты Шайыр ауылының мәдениет үйінде ақ жаулықты аналар жас келіндерге қолөнердің қыр-сырын үйреткен «Ұлттық құндылық - тәрбие өзегі» атты мәдени шара болды, деп хабарлайды mangystaumedia.kz облыстық ҚКО-ға сілтеме жасап.
Қолөнер бұйымдарын дәріптеген шеберлер жас буынға жүн бояу, өрмек, ала теру тоқу, ұршық иіру, жіп есу, жүн сабау, талдырма басудың әдістерін үйретті.Сонымен қатар дастарханының сәні болған құрт, ірімшік қайнатуды үйретті. Жастарға тәрбиелік мәні зор болған бұл шара алдағы уақытта да жалғасын таппақ.
- Ұмыт бола бастаған киіз басу, өрмек құру, ала теру тоқуды біз расымен білмейміз. Мұндай шараның жастарға берері көп. Әрбір бұйымның астарында үлкен мән-мағына жатыр. Аналарымыздың естеліктерінен-ақ көз алдымызға әжелеріміздің ән айта отырып ұршық иіріп, ши тоқып, жастар жағының өрмек құрып жатқан сәттері келді. Құрақ құраудың өзіндік тәсілі, киіз басудың қыр-сыры бөлек екенін түсіндік. Сол ұмыт бола бастаған қолөнер бұйымдарды қайта заманға лайықтап жаңғыртуымыз қажет, - деді шара қатысушысы Раушан Мәжілісова.
Сондай-ақ, жергілікті шеберлер Зияда Хасанова, Бағила Абаева, Зарина Жалғасбаева, Нұржамал Абешова, Әсима Қойлыбаева және Жаңыл Құлқаева өз тәжірибелерін бөлісті.
Осыған орай, Маңғыстау ауданының әкімдігі осындай іс-шараларды тұрақты өткізіп тұру туралы шешім қабылданды
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
