Сотталғандар қауіпсіздігі төмен мекемесінде «Біз халықпыз, біз біргеміз» қайырымдылық қорына көмек көрсетіп жатыр, - деп хабарлайды mangystaumedia.kz.
Аталған мекемеде жазасын өтеп жатқандар Ақтау қаласының әр жерінде жұмыс істейді. Ал кешке қарай жазасын өтеуге қайтады. Түзеу мекемесі қазір «Біз халықпыз, біз біргеміз» қайырымдылық қорымен тығыз байланыста. Жуырда сотталғандар арасынан 8 адам қала тұрғындары тонналап әкелген киімді сұрыптады. Ал үш сотталған әйел бірнеше сағаттың ішінде жүздеген манты жасады. Олар әр сенбі сайын жалғызбасты мүгедектерге жеткізеді.
– Сотталғандар ерікті түрде жұмыс істейді. Қор жұмысынан оралған соң өзге де сотталғандарға айтады. Олар да көмектесуге ниеттерін білдіреді. Мәселен, жұма күні жәрмеңкеге 15-20 адам барады. Әрине, көмектескісі келетін жан одан да көп. Бірақ, қор сотталғандардан қажетіне қарай көмек сұрайды, яғни олар күнде бармайды. 1 маусымға орай қайырымдылық шарасына көмектеседі. Яғни, бірі көрпе, жастық тігуді, заттарды сұрыптауды жоспарласа, басқалары қаржылай көмектеседі. Біз қайырымдылық көмекті жинауға арналған жәшік орнаттық, ол бақылау-өткізу пунктінде тұр. Мұнда сотталғандар да, қызметкерлер де ақша жинайды. Еріктілік - сотталғандарды тәрбиелеу әдістерінің бірі, олар үшін басқаларға көмектесу маңызды. Себебі аз қамтылған отбасында және балалар үйінде өскендер бар. Айтпақшы, барлық волонтерлік іс-шарада ынталандыру мақсатында алғыс хаттар табысталады. Бұл сотталғандардың мінездемелерін құрастыру кезінде ескеріледі, – дейді Маңғыстау облысы бойынша ЖМ 172/8 ДУИС бастығы, әділет майоры Арман Саржанов.
Қайырымдылық қорының басшысы тек сотталғандар ғана емес, жоғары оқу орындары мен колледж студенттері де көмектесетінін айтады. Өйткені, қорда жұмыс көп. Мұнда айына 20-30 тоннадай киім-кешек, ыдыс-аяқ жиналса, ал бір демалыстың өзінде 2-3 газель зат жиналады.
- Барлық маусымға арналған әйелдер, балалар, ерлердің киімдері мен аяқ киімдерін, кез келген ыдыс-аяқты, кітаптарды, ойыншықтарды қабылдаймыз. Өткен жәрмеңкеде 400 адам болды. 10 тоннадай киім-кешек жиналды, нан тегін таратылды, оны да осында еріктілер пісірді. Негізінен тұрмысы төмен отбасылар немесе облысқа жақында ғана келіп, тұрмыстық заттарын алып үлгермегендер келеді. Бізге күн сайын жәрмеңке ұйымдастыруды сұрайды, бірақ айына бір рет өткіземіз. Себебі – осы заттарды сататындар бар. Яғни, біз ұйымдастырған жәрмеңкелерден заттар алып, басқа елдерге келісін 500 теңгеден сататын фактілер кездеседі. Өйткені, бізде көптеген жаңа заттар, тіпті, күздік пальтолар мен шубаларға дейін бар. Бізде киім-кешек тарататын бірнеше әлеуметтік дүкеніміз болды, бірақ оның барлығын жаптық. Сөйтіп Ақтауда біреуін ғана қалдырдық. Тұрғындар аудандарда ашуды сұрайды. Біз қарсы емеспіз, бірақ шын мәнінде мұқтаж жандар көмек алуын бақылау керек», - дейді «Біз халықпыз, біз біргеміз» қоғамдық қорының директоры Иманғазы Досмұхамбетов.
Қазір қор балаларды қорғау күніне қызу дайындалып жатыр. Тізімге церебральды сал ауруы, аутизм және Даун синдромы бар 200-ге жуық бала кіреді. Осы балалардың жартысы үшін сыйлықтар дайындалып қойған. Қазір еріктілер балаларға арналған жаңа ойыншықтар, жұмыс үстелі және үстел ойынын, басқатырғыштар, жемістер мен тәттілер сатып алу үшін демеушілерді іздеуде.
«Әрине, мен ірі компаниялардың назар аударуын қаладым. Бірақ қазірдің өзінде бізге тұрақты түрде көмектесіп жатқандарға алғысым шексіз. Негізі мұқтаж жандарға заттарды жеткізуде шағын компаниялар мен қала тұрғындары белсенді», - дейді Иманғазы Досмұхамбетов.
Айта кетейік, Ақтауда 20 мамыр күні 32 В шағынауданы, «Шаңырақ» тұрғын үй кешеніндегі 12 корпус мекенжайында мұқтаж жандарға арналған жәрмеңке өтеді. Жәрмеңке сағат 12:00-де басталады, мұнда олар қажетті заттарды тегін ала алады.
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
